Parlamentario mr. Juan E.Thijsen ta sigui di cerca e caso di Ministro Paul Croes na unda Ministro Paul Croes ta wordo sospecha di delitonan serio. Ministerio Publico cu ayudo di instancianan di Aruba y di Reino ta den un proceso penal investigando e caso profundamente na unda Ministro Paul Croes a ser declara sospechoso hunto cu varios coordinador. Sinembargo segun Parlamentario mr. Juan E. Thijsen ta importante kico ta pasa cu Ministro Paul Croes durante e proceso aki. Manera conoci Ministro Paul Croes a declara su mes non activo y gobierno di Aruba a bay di acuerdo cu e Ministro ta na cas cu pago locual segun nos constitucion no por. E no ta cu vacacion ni ta malo di salud. E caso aki di Ministro Paul Croes lo ta determinante pa casonan den futuro unda un Ministro di Pais Aruba ta envolvi.
E caso di Ministro Paul Croes tin acusacionnan hopi serio esta di corupcion y labamento di placa y ta bira pio pasobra no ta un persona so ta envolvi sino ta papia di un grupo di hende pues akinan ta trata di crimen organisa y no ta descarta cu tin mas Ministro envolvi. Tumando e seriedad di e caso Ministro Paul Croes mester a retira boluntariamente y tambe gobierno mester a tuma paso contra Ministro Paul Croes. Mike Eman al contrario di e caso di Lainda Westerhof den caso di Ministro Paul Croes a scoge pa no a haci nada. Siguientemente e turno a bin pa parlamento di Aruba. Segun Constitucion “ zijn de Ministers verantwoordelijk aan de Staten”. Akinan tambe varios cos a bay robes. Presidente di Parlamento no ta yama e reunion pidi mesora. Pio ainda tanto e Presidente di Parlamento como Fraccion di AVP no tabata mira necesidad pa e reunion. Despues ta bin e fayo cu Ministro Paul Croes no tabata presente na e reunion publico.
Esaki ta mina e derecho di Estado di nos Pais. Parlamento finalmente tabata tin e oportunidad pa coregi e fayo di laga Ministro Paul Croes non activo y finalmente Fraccion di AVP ta faya votando contra mocion di MEP di desconfianza contra Ministro di Labor. MEP a basa su mes riba articulo den constitucion “ De Minister legt zijn functie neer indien hij het vertrouwen van de Staten niet meer heeft”. Akinan AVP ta scoge pa interes partidista na luga di interes general. No ta straño si segun Parlamentario mr. Juan E.Thijsen ya cu e mentalidad coruptivo y criminal di AVP ta nan modus operandi. No ta pornada den pasado prensa internacional a papia di e “roversbende”di Henny Eman y awor ta papia di “de bende rond Mike Eman”. Segun Parlamentario mr. Juan E.Thijsen na ningun pais democratico ta existi cu un Ministro cu ta sospechoso di delitonan grave ta keda sinta. Despues cu Parlamento di Aruba a faya segun
Parlamentario mr. Juan E. Thijsen palabra awor ta na Hulanda. Integridad ta un tema hopi importante den Reino y Hulanda ta riba Corsou y Sint Maarten pa cu esey y awor Aruba tambe lo tin atencion. Si nos tende Ministro Paul Croes retira boluntariamente lo ta pasobra Hulanda ta menasa cu un KB. Al contrario si no tende nada di Hulanda ta pasobra Hulanda definitivamente ta scoge pa mantene AVP na mando pa nan por deshaci na Aruba. Hulanda sa cu MEP e tin un negociado fuerte pa interesnan di Aruba. Parlamentario mr. Juan E. Thijsen ta pidi pueblo sigui acontecimento di cerca.
