Via un Decreto Ministerial ministro encarga cu enseñansa, dr. Rudy Lampe, a tuma e decision, apoya pa conseho di ministro, pa pasa Colegio San Nicolas, entrante aña escolar 2021-2022 pa e fundacion Stichting Onderwijs Combina, cu ta opera e scol pa enseñansa secundario De Schakel.
Tambe a honra e peticion di e fundacion pa haya subsidio como scol di enseñansa no gubernamental entrante 1 di januari 2021. Pa esaki e fundacion a entrega un peticion dia 20 di januari 2020.
Consideracion pa e pasonan aki ta e calidad halto cu e fundacion a logra te awe den operacion di nan scol, di cual e decreto ta menciona e porcentahe halto di graduado (>90%) den examen final y cu nan ta coopera estrechamente cu inspeccion di enseñansa di Aruba como tambe Hulanda.
E decreto ta menciona cu dia 16 di maart e fundacion a laga sa cu nan ta desea di aplica nan modelo di scol riba Colegio San Nicolas, a traves di cual lo por logra e mesun bon resultadonan manera na Schakel College, y cu nan ta desea di tuma over formalmente e responsabilidad pa Colegio San Nicolas y tambe ta desea di colabora den e preparacion di esaki, segun texto di e decreto.
Un dia despues, 17 di maart, tambe segun e decreto, Conseho di Ministro a tuma e decision pa aproba e proposicion y pa entrante 1 di januari 2021 otorga Schakel College di Stichting Onderwijs Combina subsidio for di fondonan publico, y tambe aproba e traspaso di Colegio San Nicolas entrante 1 di augustus 2021.
Pa facilita e traspaso aki lo mester haci preparacion, tanto na nivel di dirigencia di e scol como na nivel di e scol y su operacion y maneho diario, y cu pa esaki ta institui un team di coordinacion, consistiendo di un representante di Dienst Publieke Scholen y un representante di Stichting Onderwijs Combina.
Esaki ta encera cu e maneho diario di Colegio San Nicolas entrante 1 di augustus
2020 te cu 31 di juli 2021 lo ser hiba pa un interim management team. E team di coordinacion lo tin na su encargo dirigi y instruccion interno na e interimmanagementteam di Colegio San Nicolas, y determina reglanan di maneho, cu mandato di ministro di Enseñansa, den su calidad di autoridad supremo pa Colegio San Nicolas.
E interimmanagement team lo prepara, guia pa e team di coordinacion, e preparacionnan necesario pa e transicion di Colegio San Nicolas, entre nan implementacion di un ‘quick scan’ den cual ta delinea e lineanan grandi di e preparacionnan cu mester haci riba tereno di finanzas, enseñansa, infrastructura, logistica y Recurso Humano (HR).
E team di coordinacion lo duna cuenta na ministro encarga cu enseñansa, ken ta keda e responsable final pa e scol te 31 di juli 2021.
Entrante 1 di mei 2020 a keda institui un team di coordinacion consistiendo di sra. i.H.G. La Haye-Teunissen como representante di Stichting Onderwijs Combina, y como representante di e mandatario, como autoridad competente, sra. M. Lee-Tromp.
E team di coordinacion tin como tarea pa implementa e quick scan menciona, riba e terenonan menciona. Tambe pa hiba un procedimento di seleccion pa e interim-management
pa e maneho diario di Colegio San Nicolas desde aña escolar 2020-2021 y pa haci un proposicion na ministro encarga cu enseñansa, cu ta tuma decision.
Tambe pa duna orientacion y guia na e interim-managementteam, y supervisa e bon curso di tanto e operacion diario di enseñansa na Colegio San Nicolas como tambe di e preparacion pa e transicion entrante 1 di augustus 2021. E interimmanagementteam ta duna cuenta na e team di coordinacion.
Ademas e team di coordinacion lo mester vigila asunto di posicion huridico di e personal di Colegio San Nicolas, e procedimento di reorganisacion y un eventual paso di personal pa Stichting Onderwijs Combina, y pa colabora den esaki cu Departamento di Recurso Humano. Tur esaki describi den texto di e Decreto Ministerial, firma dia 28 di april 2020 pa e mandatario encarga cu enseñansa.
Nota di redaccion:
E decision sorprendente di nos mandatario encarga cu enseñansa ta mustra riba un aparente escogencia pa mehora calidad di e institucion aki (Colegio San Nicolas) pero si esey ta e criterio nobo, anto ta cuminsa cuestiona e mero existencia di enseñansa publico. Tambe e decreto ta briya atrobe como muestra di transparencia, o mejor dicho e ausencia di tal merito. Di otro banda, e decreto ta mustra riba rapidez di decision, si acaso esey ta requeri den e asunto aki: dia 16 di maart e fundacion ta duna di conoce su deseo pa tuma e scol over, y pa su mañan tin un decision caba di conseho di ministro… A tuma un decision anto sin laga investiga e factibilidad di e caso? Nos lo tende bastante comentario riba e decision aki.
