Den un comunicado di prensa di fecha 21 di juli 2020, ministro encarga cu enseñanza, dr. Rudy Lampe, a anucia e acuerdo na cual a yega cu Obispado y fundacion pa enseñanza catolico na Aruba, SKOA, pa maneho den e tempo venidero di Colegio Arubano. Seguidamente e texto di e comunicado.
E ultimo simannan tabatin algun desaroyo rond di Colegio Arubano cu a provoca expresionnan conflictuoso di varios banda.
E hecho ta cu dia 13 juli 2020 Obispado di Willemstad a retira e signatura catolico di Stichting Voortgezet Onderwijs (SVOA). Dia 14 di juli 2020 e subsidio di gobierno a keda retira.
Mientras tanto, Obispo di Willemstad y Minister di Enseñansa, Ciencia y Desaroyo Sostenibel a yega na un acuerdo pa loke ta futuro di Colegio Arubano. Conforme e acuerdo aki:
a. Colegio Arubano, entrante prome di augustus 2020 lo keda administra pa Stichting Katholiek Onderwijs Aruba (SKOA);
b. a forma un comision tripartite, consistiendo di tres miembro nombra pa Obispo di Willemstad, SKOA y Minister di Enseñansa, Ciencia y Desaroyo Sostenibel, pa discuti y determina e condicion nan bao di cual lo por pone Colegio Arubano di forma definitivo bao di SKOA;
c. e comision aki lo mester entrega, mas tarda dia 15 di september 2020, un conseho unanime;
d. en caso dia 15 di september 2020 partidonan no yega na un acuerdo, Colegio Arubano lo cay bao autoridad di Minister di Enseñansa, Ciencia y Desaroyo Sostenibel.
Contrario na expresionnan haci, entre otro den medionan di comunicacion, mayornan cu tin yui na Colegio Arubano, lo no mester inscribi nan yui mas na SVOA pa e aña escolar venidero. Mas den siman lo anuncia unda y di ki manera inscripcion lo tuma lugar. E mayornan no mester preocupa, nan yuinan lo haya les riba tur nivel.
Tambe e siman aki lo acerca e personal cu ta traha na Colegio Arubano, pa discuti nan posicion huridico entrante prome di augustus 2020. Den e contexto aki, Minister di Enseñansa, Ciencia y Desaroyo Sostenibel kier trece dilanti cu semper Directie Financiën a paga salario di personal cu ta traha na e diferente directivanan di scol subsidia pa gobierno, di forma directo na e empleadonan. Pago di salario di personal di Colegio Arubano ta keda garantisa.
Nota di redaccion:
E noticia aki ta sorprendente, den e sentido cu, despues cu presencia di Obsipado tabata limita na solamente un puesto den e directiva di SVOA, cu nos ta comprende bon awor e idea ta pa Colegio Arubano, cu semper tabata un scol pa tur creencia y esnan cu no tin, awor e pensamentonan ta bay den direccion di un scol completamente bao di un fundacion cu ta opera scolnan explicitamente catolico. Nos no ta asina sigur cu di e manera aki ta trece paz y tranquilidad na Colegio Arubano, y esaki ta loke e scol mester, mas cu tur otro cos.
