Ministro di Defensa di Colombia, Carlos Holmes Trujillo, a muri pa via di un neumonia causa pa Covid-19, awe diamars den oranan di marduga.
Cu 69 aña di edad, Trujillo tabata un di e funcionarionan mas destaca di gobierno di Ivan Duque, cu un carera politico largo. Ta trata di e prome halto funcionario cu ta muri a causa di e virus na Latinoamerica.
Colombia ta enfrenta e di dos ola di e pandemia cu Unidadnan di Cuido Intensivo casi yen, cuarentena estricto nobo y sin un fecha exacto di comienzo di vacunacion.
Trujillo, cu tabatin dos siman interna den Hospital Militar di Bogota, a bira un di e 51.000 victimanan mortal cu e virus a laga na e pais.
Como canciyer di Duque, Holmes Trujillo tabata un di e principal gestornan di e asina yama ‘cerco democratico’ pa Venezuela, un strategia multilateral pa pone presion riba gobierno di Nicolas Maduro.
El a asumi e cartera di Defensa despues di renuncia di Guillermo Botero pa via di un scandal cu surgi despues di un bombardeo di un campamento di supuesto guerrillero den cual 8 mucha a muri.
Su carera politico tabatin vinculo cu liberalismo: e tabata constituyente di Asambla Nacional Constituyente di 1991, como lider di un di e listanan liberal y tabata ministro di Educacion y Gobierno durante e gobiernonan di Cesar Gaviria y Ernesto Samper, como tambe Alto Consehero di Paz den e ultimo gobierno aki.
Durante mandato di Alvaro Uribe (2002-2010), Trujillo a bandona fila di liberalismo y tabata candidato presidencial na 2014 y 2018 den e movimento di e ex-presidente. Cu Duque, el a bira un di e funcionarionan clave den su gabinete. Dirigentenan di tur sector politico a pronuncia nan solidaridad cu su famia.
