Cumpliendo cu articulo 38 inciso 5 di nos Ordenanza Electoral Ministro di Asuntonan General, sra. mr. Evelyn Wever-Croes, ta participa cu:
- Eleccion pa Parlamento di Aruba lo tuma luga diabierna, dia 25 juni 2021, for di 08:00 or pa 19:00 or.
- E contenido di articulo 2:43 pa 2:47 di nos Codigo Penal ta stipula lo siguiente:
Esun cu na ocasion di un eleccion prescribi pa ley, ta aplica violencia of ta menasa di aplica violencia pa intencionalmente obstrui un persona di eherce su derecho di vota sin impedimento, ta ricibi un castigo di prison di maximo cuater aña of un multa di categoria 4.
Esun cu na ocasion di un eleccion prescribi pa ley, ta aplica soborno cu regalo of promesa pa un persona no eherce su derecho di vota of pa haci esaki na un cierto manera, ta ricibi un castigo di prison di maximo dos aña of un multa di categoria 4. Cu maximo e mesun castigo ta castiga e votado cu ta acepta soborno pa medio di regalo of promesa.
Esun cu na ocasion di un eleccion prescribi pa ley ta comete un acto engañoso, causando cu un voto ta perde su balor of ta diferente for di loke e votado a indica ta ricibi un castigo di prison di maximo dos aña of un multa di categoria 4.
Esun cu intencionalmente ta pasa pa un otro persona ora di participa na un eleccion prescribi pa ley ta ricibi un castigo di prison di maximo dos aña of un multa di categoria 4.
Esun cu na ocasion di un eleccion prescribi pa ley intencionalmente ta desbarata un votamento cu a tuma luga of cu ta comete un acto engañoso cu ta afecta e resultado di e votacion ta ricibi un castigo di prison di maximo dos aña of un multa di categoria 4.
