Pa kita atencion probablemente di e detencion di e ministro suspendi, a core pone un rueda di prensa tocante inicio di exploracion di gas, cu un prome perforacion cu lo bay tuma luga otro aña. Noticia bieu, pasobra e ministro concerni mes a anuncia esaki anteriormente. Kico ta e importancia di e decision di e companianan Repsol y Total pa bay haci esaki? Nada mas cu cumpli cu e contracto cu nan tin cu Aruba. No a bisa mucho tocante e posibel scenario cu lo bay tuma luga, a parti di un hallazgo exitoso. Na prome luga, ora haya gas, esey no necesariamente significa cu e cantidad ta grandi suficiente pa realisa un explotacion comercial exitoso. Si esey ta e caso, y ta inicia un proceso pa yega na explotacion di gas, na e momento aki nos ta sigur cinco aña aleha di e momento cu e prome gascu por comercialisa sali di subsuelo. Asina tanto tempo e preparacionnan pa yega na explotacion ta tuma.

Kico esaki ta significa? Cu eventual hallazgo di gas no por hunga un papel a corto plaso na nos pais, no pa boost nos economia, no pa yuda den e fase critico aki, unda e refineria no ta iniciando su rehabilitacion, y economia ta den preta serio. Esun cu ta goberna pa e tempo ey, lo bay probecha di loke ta haci awe. Si esey ta e mesun partido cu a haci e tramitenan cu e companianan petrolero aki den e ultimo añanan aki, esey no ta den nos man. Pa e debate politico di e momento aki e asunto aki no tin relevancia, pasobra ta hopi awa mester pasa banda di Aruba bay pabao, prome cu mira resultado concreto. Den e proximo periodo di gobernacion anto, nos mester atende un situacion dificil, den cual nos mester bay guera cu otro arma. Y diripiente e armanan cu tin na nos disposicion, no ta mustra tanto impresionante.

Poco poco nos ciudadanonan ta cuminsa ripara cu hopi di e bunita plannan di e gabinete aki no ta basa riba un vision solido di kico realmente ta importante. Es mas, awor no mas hende ta cuminsa ripara cu e gobierno aki tin su prioridadnan robes. Hopi critica e vice-presidente di Camara di Comercio a haya pasobra el a tribi di bisa durante e debate di siman pasa, loke hopi mas ta pensa, cu e gobierno aki ta uzando e bunita vision di green y di sostenibilidad como ta para bo tras di cual ta hiba un politica anticua di sigui e rutanan tradicional di explotacion di nos suelo y subsuelo. Y de paso no ta haciendo absolutamente nada na e tareanan cu a formula internacionalmente pa yega na un mundo mas sostenibel na 2030.

Nos ta mir’e den tantisimo cos cu ta sucede recientemente. Por ehemplo e promesa cu e 16 areanan defini como area di proteccion special, entre nan e wetlands cu nos isla conoce, ta keda berde, pa despues bira y duna un compania local grandi un parti di e saliña dilanti e hotelnan, pa cuminsa construccion di un proyecto bastante grandi ey. Claro cu nos ta tende e criticonan bisa caba, cu esey ta djis un pida chikito, cu ademas ta den un area yen di construccion grandi caba. Esey ta berdad, pero e punto ta cu asina, manera a sucede tanto biaha caba, ta habri porta hancho pa sacrifica henter e area. Nos por imagina con e luga aki lo ta aki binti aña, unda lo traha henter un ciudad nobo dilanti e hotelnan? No bisa cu e no ta posibel, pasobra no mucho tempo pasa no tabatin practicamente nada dilanti e hotelnan ey, y mira awor…

Loke nos mester cuminsa comprende ta cu nos no por keda adora un filosofia di crecemento ciego, riba un pida baranca di menos di 200 kilometer cuadra. Y si nos ta keda eligi mandatario cu por conta storia bunita, pero al fin y al cabo ta resulta di ta esunnan cu mente maligno, cu ta bende trankilamente e delaster pida tereno di propiedad publico cu ta keda cu the highest bidder simplemente pa saca probecho personal, ta e problemanan aki nos ta keda ripiti. Esun cu a keda denuncia pa esaki no a ser yama ainda pa bin duna cuenta; laga nos spera cu husticia ta sigui cana e caminda cu el a inicia.

Importante ta cu nos mester cuminsa mira cu e pantaya berde, hustamente pa e exito cu e tabatin, a bira un cortina miho ainda pa tapa e actonan inmoral y delincuente cu tabata tuma luga. Un pueblo vigilante no ta haya sorpresa asina lihe di corupcion na gran escala. Esey ta sucede hustamente ora e delincuente ta kere cu tur hende ta na soño. Esey ta e cosecha amargo cu nos a cuminsa mira e siman aki, unda ainda nos no a tende nada di e mandatario principal, cu a custumbra nos caba cu e idea, cu sirbi su partido, y e interesnan coruptivo cu ta bay scondi eytras, tin prioridad. E sucesonan na e debate siman pasa ta mustra cu e no ta respeta nos.