Mientras cu Bon Dia Aruba mes a caba di cumpli cu su tarea di informa obhetivamente, publicando declaracion di ministro encarga cu Energia, unda e ta declara textualmente cu CITGO ta esun cu ta bay inverti den y opera e refineria. Na mesun momento ya caba a sali un declaracion di CITGO Petroleum Corporation (CITGO Merca) riba nan website, unda nan ta clarifica e asunto. Nos ta considera e declaracion aki asina importante cu den e edicion di Bon Dia di awe por haya e texto completo traduci na Papiamento, riba pagina A5.
For di e declaracion di CITGO ta sali varios punto remarcabel:
- CITGO Merca no a firma acuerdo cu gobierno di Aruba; esey ta CITGO Aruba. CITGO Merca ta splica den su comunicado di prensa cu CITGO Aruba ta e grupo di compania local di operacion na Aruba, cu ta subsidiario di PDV Holding, cu na su turno ta un subsidiario di PDVSA. E grupo ta consisti di cuatro NV local, lanta algun tempo pasa via un trustkantoor local. Un di nan ta CITGO Aruba Refining N.V., di cual por supone cu ta bay ta responsabel pa opera e refineria.
- CITGO Merca ta bay brinda servicio na e compania local cu ta lease e facilidad.
- CITGO Merca ta declara cu e rehabilitacion ta bay costa entre $ 450 miyon y $650 miyon, cual lo financia externamente. Es decir, esun cu ta bay rehabilita y opera, lo mester bay fia y no CITGO Merca.
- E partidonan envolvi den e acuerdonan (cu no ta inclui CITGO Merca) ta bay evalua e posibilidad di suministro di gas natural for di Paraguana pa Aruba. Logicamente esaki ta implica cu no tin plan traha caba pa realisa esaki y tampoco e ta inclui den e gastonan calcula pa e rehabilitacion di e refineria mes.
E declaracion di 11 di juni ultimo ta pone ‘en tela de juicio’ loke ministro de Meza a declara dialuna durante su conferencia di prensa. Eyden el a declara enfaticamente cu ‘CITGO’ ta bay opera e refineria. Cu esey, no por bisa cu e ministro a papia mentira, pero si cu el a sconde e situacion berdadero, cu ta haya claridad den e declaracion di CITGO Merca. E acuerdo di rehabilita y opera e refineria bao di un lease ta entre e companianan local, NV nan di Aruba, cu cada un ta bay atende un parti di e actividadnan economico riba e tereno. Asina tin un compania dedica na refinamento, otro pa atende e parti di transshipment, etc. Di loke por comprende di e declaracion di CITGO Merca, tur e companianan local a bira subsidiario di PDV Holding, cu ta un subsidiario di PDVSA lanta na Merca, cu tin e accionnan di CITGO Petroleum Corporation. Esaki ta significa cu CITGO Merca no tin ningun responsabilidad den e proyecto na Aruba, unda manera nan ta declara nan ta brinda conseho y asistencia tecnico na un empresa na Aruba, cu via e construccion huridico aki por considera un empresa ‘ruman’ di CITGO Merca.
Ki implicacion esaki lo tin ora di bay busca financiamento, di cual CITGO Merca ta declara cu esaki ta algo ‘externo’? Cu ta e compania(nan) local cu nomber di CITGO, acompaña pa e holding di PDVSA menciona lo ta esunnan cu mester sali en busca di financiamento pa e proyecto di rehabilitacion y seguidamente pa e tuberia di gas cu obviamente ta den fase di exploracion di e posibilidad ainda. Esaki ta crea un panorama un poco diferente cu loke gobierno di Aruba tabata pinta pa nos, creando e impresion cu ta e compania Mericano, cu tabata inspira mas confiansa cu un PDVSA cu ta na rand di un bancarota e aña aki, lo a keda encarga cu e proyecto y awor ta resulta cu no ta berdad.
Un pregunta cu ta surgi e ora ta con e panorama financiero pa e companianan CITGO local ta bay ta, specialmente esun encarga cu e refineria. Imagina esaki: un compania local, cu cero propiedad na su nomber, mester bay busca capital externo, siendo parti di henter e imperio financiero di PDVSA, cu no tin capacidad mas pa fia placa cerca ningun institucion serio na mundo, y cu talbes por fia placa a termino corto contra interes haltisimo di e parti di mercado financiero considera ‘sharks’?
Of por ta cu gobierno no ta bisa nos cu nan ta bay purba haya prestamo via e compania propiedad di Aruba cu lo hereda e propiedadnan di Valero? Pasobra e compania aki si tin ‘assets’, entre otro e propio refineria… Pero esey no ta loke gobierno tin lunanan largo ta conta nos; tur e tempo, desde september aña pasa a canta e cantica cu CITGO, y e unico CITGO e tempo ey tabata CITGO Merca, lo a bay lease e refineria y percura pa financiamento pa e rehabilitacion. Ademas, tabata papia di e tuberia di gas como un hecho caba, y awor ta resulta cu no tin nada di esey ainda. Gobierno tin hopi di splica den parlamento den e dianan nos dilanti…
