Despues di tur e panico y sensacion cu vocero di Servicio di Impuesto a causa cu su anuncio cu un gran parti di Aruba tin su number di auto sin paga, o no paga completo, ata ministro encarga cu Finanza, bao di cual ta cay tambe Impuesto, a sali pa coregi personalmente e informacion incorecto cu e departamento a emiti. No mucho agradabel pa e vocero cu, manera nos ta comprende, ta djis haciendo su trabao.
No ta e mes ta inventando storia pa conta Aruba, ta otro hende mas halto den e organisacion mester a autorisa e ‘blooper’ mayor aki. Lo ta bon si nos por haya tende ta ken y kico a causa un eror asina grandi. Ta bon cu nos ta custumbra di no guli tur cos cu nos haya sin investiga. Y djis pa nos ta completo, nos ta repasa loke ministro mes a trece dilanti, en todo caso manera esaki a aparece caba den otro medio di comunicacion. Segun e mandatario, tin 297.000 kwartaal pa paga. Nos ta supone cu e ta referi na e total di usuario cu mester paga impuesto: 297.000 dividi pa 4 ta: 74.250. Esey ta e total di vehiculo. Di e total di kwartaal pa paga, mas o menos 5% mester drenta ainda. Esey ta cuadra tambe cu e cifranan den gobierno su informe pa tercer trimester di aña, unda a señala cu 88,3% di loke mester cobra, a drenta caba. Di e restante 11,7% anto, mas cu mita lo mester a drenta den october y november, loke ta parce logico tambe.
Loke ta keda un misterio, ta con personal di e departamento a yega na e conclusion cu pa 46.058 vehiculo e pago pa e aña aki tabata incompleto ainda. Ta keda un pregunta: unda e director di Servicio di Impuesto a keda, den tur esaki? Nos lo kier sa si el a autorisa e noticia cu e vocero permanente di e servicio a duna na prensa. Nos mag supone cu ora bo ta saca tipo di noticia aki, bo ta asumi responsabilidad pa esaki. Como hefe, despues bo ta regla cuenta internamente cu esnan cu a faya bo, pero bo ta duna cara na publico y ta pidi dispensa pa semehante disparate produci. Nos no a tende nada.
Ya cu nos ta tratando cifra y estadistica gubernamental, ta bon pa dedica atencion tambe na otro instancia cu ta lucha cu problema di informacion, pero di otro indole. Pa hopi aña caba e registronan basico di Censo ta lidia cu e problema di mantene e registro di residencia up to date. Basicamente ta papiando aki di algun problema distinto, por ehemplo dependiendo di si ta trata di Arubiano o stranhero. Den e prome caso ta trata di hende cu a bay biba afo, pero nunca a kita nan nomber for di registro. Esey tin un bentaha tambe pa e persona, ya cu aña di residencia ta conta pa pago di AOV despues.
Na varios ocasion a yega di toca e tema tambe di esnan cu ta bay afo pa studia, y en todo caso na Hulanda mester demostra cu nan a cancela nan registracion na Aruba pa nan por inscribi aya na un gemeente. Tanten cu ta asina cu e ciudadano Hulandes por cobra AOW pa e añanan inscribi na Hulanda, ta logico cu no ta bay cobra na Aruba tambe. Esnan cu tin un bentaha ta esnan cu por biba na otro pais sin cancela nan registracion na Aruba, pasobra ‘nan añanan ta sigui core’. Pero awor e problema grandi: e stranheronan cu ta registra ora nan bin biba na Aruba pa cierto tempo, pero no ta cancela esaki ora nan bolbe nan pais. Esnan mas sabi ta bolbe de bes en cuando pa haci uzo di AZV, loke ta posibel pasobra nan ta registra keto bay; sin contribui un cen cu trabao y prima. Hera nan ta subi avion cu maleta yen di remedi haya gratis na Aruba. Esey ta posibel pasobra derecho riba AZV ta basa riba residencia, no riba contribucion na e fondo. Ta posibel anto cu un stranhero, cu tin añanan largo sin tin un solo dunado di trabao cu a paga prima di AZV pe, ta haya trato manera nos tur. Esaki ta ilustra tambe cu no ta solamente na Censo cosnan mester cambia,pero na e otro instancianan envolvi tambe. No ta mucho tempo pasa cu nos a haya e noticia ‘chistoso’ (depende con bo mir’e) cu SVb despues di 15 aña a logra haya dato di stranhero for di DIMAS.
Nos ta contento di tende cu porfin algo ta ser haci pa caba cu e fenomeno aki, por lo menos reduci esaki te un minimo. Pa haci esaki bon, lo ta ideal pa por acopla diferente database dentro di gobernacion, di tal manera cu por tin un miho bista riba esunnan concerni, sin intercambio di papel. Esaki por caba tambe cu e practica ridiculo cu ta e persona mester bay busca un papel pone dilanti di e funcionario, mientras cu via informacion digital e funcionario mes por constata kico ta kico. Ta bira tempo pa cambia.
