Di un momento pa otro, un ministerio a keda decapita. E mandatario a firma pa su retiro y ademas a retira for di e lista di partido pa proximo eleccion. Con e curso di e proceso penal lo ta nos no por bisa, en todo caso un posible retorno na e puesto ministerial ta improbable. Ademas, cu e pasado di ministro cuestiona di tal forma cu e no por a bolbe den e segundo gabinete H. Eman como mandatario, y awor cu e siguiente oportunidad a termina di e manera aki, ta bastante probable cu hamas e lo haya oportunidad atrobe pa goberna.

Na Den Haag mester por tin (ex-)politico cu ta lamenta cu nan a laga e actual gobierno convence nan cu e politico aki lo mester a bolbe den gobernacion. E sucesonan di e siman aki ta confirma e pensamento di hopi persona cu su partido tabata tuma un riesgo grandi, aumenta pa e informacion con e tabatin su despacho organiza manera un fiesta grandi di nepotismo. E no ta e unico den esey y tanten nos no ta mira medida contundente tuma pa preveni esaki, cos no ta drecha.

Pero, cu e ministerio -demisionario – sin capitan, con ta para realmente cu e carteranan cu supuestamente tabata indispensable pa e ministro aki haya nan? Interes lo bay hopi den direccion di labor y admision di stranhero, pero con ta para cu e tramitenan pa un cambio mayor den maneho di energia? Mirando e situacion, sin gobierno y eleccion aki menos di dos luna, por supone cu por lo pronto lo no tin nada mas pa anticipa cu ta ilumina e tereno aki. Un bon momento pa evalua loke tin; al fin y al cabo, nos ta den campaña.

Despues di casi 7 aña di gobernacion di e mesun partido di mayor peso den coalicion, nos por compara kico a cambia o keda mescos riba tereno di energia. Por ehemplo, kico a cambia riba tereno di energia renovable? No tanto, ni pa bisa cu nos a avanza. Siete aña pasa a hereda un parque solar riba tereno di refineria, di cual awe no por ni comproba cu e ta den operacion ainda. Segun informacion cu nos no por averigua, e parque no ta manteni pa por funciona y no ta conecta mes na WEB. E cifranan cu WEB ta duna continuamente di produccion di energia ta duna e impresion cu e parque no ta funcionando, en todo caso e produccion di energia solar cu WEB ta brinda ta na menos di 1 MW (di mas di 120 MW total diario), ni sombra di e 7,5 mW di capacidad instala di e parque. Ademas tin inclui e contribucion di otro contribuyente di energia solar. Pakico, ni den tempo di campaña, nos politiconan no ta cuestiona e cosnan aki? Contal cu nos no ta parce di a avanza cu energia alternativo durante e gobierno aki, al contrario.

Otro tema relevante ta e plan di conversion pa gas natural na lugar di heavy fuel oil (HFO). Despues di mas di dos aña di e firmamento di e acuerdo – secreto y cuestiona – cu Eagle LNG, nada directamente visible a tuma lugar. Despues e plannan a bira mas spectacular ainda; a bin e proyecto di hidrogeno acerca, cu te awe no a cristaliza mas aleu di e fabula original. Aparentemente no ta presta atencion kico ta pasando riba tereno internacional den sector di energia pa por sa cu establece negoshi grandi den e sectornan menciona (gas, hidrogeno) no ta algo asina viable pa un isla chikito manera Aruba. Hasta e factibilidad di suministro pa consumo interno so ta algo dudoso, te pa contempla exportacion.

Recientemente e ministro actualmente encarcela tabata di biahe na Venezuela, supuestamente riba un trip priva. Sin embargo, tabatin rumor cu e lo a bay conversa tocante un colaboracion cu industria petrolero di e pais ey. Awor, fuera di cu nos no sa si el a coordina su biahe oficial cu embahada di Reino, kico esaki ta? Cu un ministro ta biaha bay un pais cu actualmente ta cuestiona pa henter mundo democratico pa e manera con a horta un eleccion legitimo di oposicion, ta algo inedito y iresponsable. Ta di spera cu e no a hinca nos den compromiso indesea cu e regimen di Maduro. Di tur manera, e hecho cu aparentemente no tabata trata di un biahe oficial ta haci tambe cu no mester tuma na cuenta kico el a haci aya: Aruba no por ta comprometi.

Tur esey ta laga nos naturalmente cu e pregunta kico si por spera na accion positivo riba tereno di energia. Cu e encarcelacion di e ministro responsable ta bira dificil pa otro candidato tuma e papel di vocero di e plannan pa e sector aki, si acaso ta posible pa presenta algo cu cara seco. Y e situacion aki lo tin su consecuencia tambe pa campaña electoral, unda posible desaroyo riba tereno di refineria ta intimamente liga na plannan di desaroyo pa San Nicolas. Sin certeza pa loke ta e destino di e tereno di refineria tampoco tin algun certeza pa e inversionnan cu por haci den centro di San Nicolas, cu e condicion cu e ciudad por haya acceso na lama. Por ultimo, ta keda e pregunta kico ta sucede cu e staff amplio di e ministro, cu supuestamente a drenta y mester bay cune?