E mocion di desconfiansa entrega pa parlamentarionan di oposicion no a ricibi suficiente voto. E partidonan den coalicion a vota contra, y asina prome minister Evelyn Wever-Croes y minister Glenbert Croes a retene nan posicion.
E mocion tabata relaciona cu e debate riba e acuerdo entre Eagle LNG y WEB. E acuerdo aki lo mara nos isla durante 20 aña na uso di gas likido y e inversionnan necesario pa esaki.
Partidonan den oposicion, AVP, MAS y Accion21 tabatin speransa di por conta cu votonan di partido den coalicion, Raiz. Partido Raiz a indica di ta contra e acuerdo di LNG pa motibo cu nan kier cuminsa e transicion pa stop uso di combustible fossiel riba e isla. Despues di un negociacion rapido dentro di coalicion di gobernacion, Raiz a dicidi di bay hunto cu su partner di coalicion, y asina e mocion a ricibi nuebe voto na fabor y diesun contra.
Tabatin otro mocion riba mesa, pa para e contract entre Eagle LNG y WEB, y esaki tampoco a haya sosten. Unico mocion cu si a conta cu sosten tabata uno entrega pa partidonan MEP y Raiz pa pidi mas claridad pa garantisa bon ehecucion di e contract, cu diesun voto na fabor y nuebe contra, reforsando e division cla entre coalicion y oposicion.
Mientras enfoke di partido Raiz durante e reunion den parlamento tabata parce di ta riba duna confiansa cu tur cos ta bon dentro di coalicion, partidonan di oposicion a critica Raiz pa, segun nan, continua cu e politica bieu en bes di duna Aruba e cambio cu ta pidi.
