Ayera ciclistanan a bin hunto pa protesta pa di dos biaha e aña aki pa mas siguridad den trafico. Nan a entrega un manifiesto na Bestuurskantoor unda ministernan di Husticia y Infrastructura a dicidi di reuni di biaha cu representantenan di e comunidad ciclismo.
Bond AWB a bin cu un manifiesto atrobe cu un gran cantidad di ciclistanan a firma. E documento ta contene 4 punto unda e bond di ciclismo ta pidi gobierno entre otro pa yuda cu un campaña di conscientisacion, crea areanan pa core bais y practica e deporte unda automobilista mester baha nan velocidad y tambe pa castigonan mas pisa pa infraccionnan haci contra ciclista. Tambe ta pidi pa mehora careteranan pa asina ta mas adecua pa core bais.
E plan tabata pa entrega e documento na minister di Deporte sinembargo e no tabata presente. Minister di Husticia Arthur Dowers a indica cu tin un comision dedica na siguridad den trafico. Y el a pidi e bond pa sinta hunto cu nan mesora pa hunto por bin cu solucionnan. E minister ta reconoce e problema y ta mira tambe cu mas asfalt ta pone, mas anti social e comportacion den trafico tambe a bira. “Ora di cana de bario awor pa scucha kico hende ta haya importante, mas keho ta bin over e situacion insigur den trafico.” E ta bisa tambe cu tin preocupacion di atraco pero ora ta mira e cantidad di victimanan, esun cu ta cay den trafico ta hopi mas.
Den reunion e ciclistanan tambe a trece nan sugerencia di nobo dilanti pa ubica un area special pa e ciclistanan riba roadbike por train den cierto oranan y unda ta avisa automobilista di esaki via borchi. Minister di Infrastructura Benny Sevinger ta comenta cu esaki ta algo cu nan por regel hopi lihe. E area menciona ta esun na Colony direccion di refineria unda por core un ronchi di 5 km cual hasta e coach nacional di ciclista na mesa a bisa cu ta un solucion cu nan por biba cu ne hopi bon.
Manera Bon Dia a publica caba gobierno ta trahando riba un plan di fietspaden rond di Aruba tambe.
Hoben herida
Manera conoci, dialuna un auto a dal un hoben ciclista, miembro di Hubada Cycling Team lagando e den situacion critico pa bay Colombia pa tratamento cu urgencia. Presidente di Hubada Cycling Team Silvhyanne Vrolijk ta conta Bon Dia cu e situacion di e hoben ta hopi critico pero e ta stabiel si. Nan a cuminsa kita cierto remedi tambe pa wak con su curpa ta bay reacciona cu esey. Pa motibo cu el a haya hopi golpi interno, ta mirando aworaki pa haci un scan di su curpa pa wak con ta bay, segun sra. Vrolijk.
“Mi ta haya hopi jammer cu mi a compronde ainda e chauffeur responsabel ta afo. Aparentemente e no tin rijbewijs. Mi ta kere ta basta y mester por bin un ley awor si pa cada automobilista cu mester dal un ciclista. Mester tin un ley serio aworaki nan pasobra ta basta.”
