Den un reunion plenario cu Directie Scheepvaart, Guarda Nos Costa, Cuerpo Policial, Santa Rosa, DTZ y conseheronan di Ministernan Chris Romero (Pesca) y Andin Bikker (Husticia) a discuti e topico di nos piscadornan y nan practica di seguridad den boto ora di subi lama pa pisca.
Segun un comunicado di prensa di gobierno, como prome decision cu a keda tuma den reunion aki ta cu lo articula un grupo piloto, presidi pa Guarda nos Costa, cu ta bay inventarisa y trece sugerencia pa Gobierno di con mester organisa e piscadornan y esnan cu ta bay tira pisca. Esaki cu e intencion di duna espacio na e piscadornan pa nan ta prepara y cumpli cu tur rekisito di prevencion ariba lama.
Den poco tempo ta spera cu e grupo aki lo trece solucionnan veridico pa asina Gobierno por pone fondonan disponibel pa por adkiri e material necesario, pa por otorga nos piscadornan e infrastructura di radio cu nan ta rekeri, pero den forma di “bruikleen”. Hunto cu esaki lo bin cu un campaña di conscientisacion pa tur cu tin boto y cu ta bay lama pa pisca.
For di momento cu Gobierno di Aruba a inicia e proyecto di Arupesca, tabata e intencion pa pone un “basestation” na Centro di Pesca Hadicurari, unda cu tur piscador cu boto mester tin den nan poder un radio, safetyvest, flair y demas implemento di seguridad necesario a bordo ora di subi lama pa pisca. Pero realisticamente no tur piscador ta cumpli cu e rekisitonan y esaki ta trece como consecuencia cu lamentablemente na diferente ocasion piscadornan no ta bolbe tera.
Den e reunion aki tanto Minister Chris Romero y Minister Andin Bikker a tuma e desicion pa organisa y structura e situacion reinante cu piscadornan pa por preveni mas tanto posibel cu mas di nos hendenan ta perde ariba lama. Un reunion hopi fructifero unda tur presente a trece nan puntonan di atencion dilanti y asina conhuntamente traha pa trece solucionnan pa e situacion reinante.
