Ministernan lo entrega 20% di nan entrada te cu december

Durante reunion dialuna ultimo prome minister Evelyn Wever-Croes a informa cu Ministernan di Gabinete Wever-Croes, lo entrega 20% di nan entrada den e tempo di crisis desde awor te December 2020. Esaki ta conta tambe pa e conseheronan di ministernan.

E situacion financiero di pais Aruba ta hopi delicado y dentro di algun siman no tin placa mas pa paga gasto di Gobierno. Ni salario di empleadonan, ni contribucion di AZV, ni na fondonan di pensioen. Gobierno ta haciendo tur esfuerso posibel pa yega na e fondonan, via Hulanda y via Merca. Pero un di e condicionnan cu Hulanda a pone ta cu Gobierno mester presenta un plan di austeridad di su propio gastonan di personal. Mirando cu ta un crisis cu ta afecta tur ciudadano di nos pais, Gobierno a drenta mesora den deliberacion cu sindicato, pero realmente no tin hopi espacio.

Premier a splica mas detayadamente cu empleadonan lo entrega di nan salario di cada luna 5%. Ademas di esey, e vakantieuitkering di juni, cada empleado lo haya mita di dje. Na augustus empleadonan ta ricibi normalmente un suma di Afl. 1.706 riba nan salario, pero lo ricibi Afl. 853, pues mita so. Na november tambe e empleado ta ricibi un suma di Afl. 1.706 riba nan salario, pero lo ricibi Afl. 853, pues e empleado lo ricibi mita di e premie.

Pensionadonan.
Pensionadonan cu ta haya pensioen di biehes di SVB lo no ripara ningun cambio, nan no ta entrega nada, ni e bonus di fin di aña. Gobierno ta haciendo su maximo esfuerso pa e fondo keda solido pa garantisa e pensioen di nos grandinan.

Pensionadonan di APFA tampoco lo mira ningun cambio den e suma di nan pensioen di cada luna.

Pensionadonan di APFA cu a baha cu pensioen prome cu 2014, normalmente ta ricibi un bonus na november di Afl. 3.170, lo ricibi e aña aki na november Afl. 1.585 en bes di Afl. 3.170. Esey ta e unico suma cu pensionadonan lo entrega. Esaki ta ekivalente na 4.5%.

Pensionadonan di APFA cu a baha cu pensioen despues di 2014, no ta ricibi e bonus aki y pues lo no entrega nada tampoco.

Durante reunion a trata varios di e preocupacionnan di sindicatonan tambe.

Companianan estatal.
Gobierno como accionista lo instrui tur e companianan pa implementa reduccionnan den cada compania tambe, como nan aporte di solidaridad. Pa loke ta directornan di companianan estatal lo implementa e Wever-Croes-norm. Esaki lo ta un maximo pa salario di tur director di companianan estatal, di maximo 130% di entrada di minister president. Esaki ta un medida structural pa awor y pa despues di e crisis. Pa e temporada di crisis lo pidi un aporte di solidaridad adicional similar di 20% di directornan, y 12.6% di empleadonan.

Pa loke ta e comisarionan den hunta di comisario, tambe lo entrega 20% di e renumeracion. Algun ya a entrega 100% caba, pero un minimo di 20% lo wordo aplica pa tur comisario.

Sindicatonan a pidi Gobierno pa yuda den baha costo di bida. Premier a informa nan cu lo tin un maneho mas estricto di control di prijs y lo amplia e canasta basico. Ademas lo delibera cu Astec, cu companianan importador y di cargo, pa baha nan gastonan pa asina tin un acuerdo cu base amplio pa yuda tur esnan cu ta wordo afecta pa e crisis.

Tambe Premier a papia cu Aruba Bankers Association y nan a indica cu banconan tambe lo tene cuenta cu esnan cu entrada ta baha. Cada persona afecta mester tuma contacto cu su banco e ora.

Corta gasto di gobierno.
Premier a indica cu Gobierno a cuminsa haci hopi ehercicio pa corta su propio gastonan, prome cu a acudi cerca sindicatonan.

Sindicatonan kier pa Gobierno kita conseheronan for di trabou y baha nan salario. Premier a splica cu desde e prome dia di Gabinete Wever-Croes, a pone un maximo na e cantidad di persona cu ta traha cu cada minister, cu ta 25. Prome cu esey e ministernan tabata traha cu centenares di persona. Ademas a bay over na paga cada persona segun salarionan di DRH. Sindicato a referi na tur e ‘fake news’ cu tin tocante salario di conseheronan di Minister y Gobierno a bolbe desmenti esey.

Cu e cambio aki so, ministernan di Gabinete Wever-Croes cada aña a scapa pais Aruba Afl. 27 miyon florin.

Mesora cu e crisis a cuminsa, Gobierno ademas a manda tur departamento instruccion pa gasta solamente lo minimo, mirando cu nos ta bay drenta den un crisis y pa pospone tur inversionnan y plannan pa e aña aki. Tambe a introduci un ‘verplichtingen stop’ a base di art 18-2 di ley di Contabilidad, cu ta stipula cu ningun hefe di departamento no por obliga Gobierno na nada.

Despues a revisa e presupuesto aproba pa Parlamento y a reduci e siguiente gastonan: gasto di biahe, gasto di conseho di experto, huur di ekipo pa oficina, material pa oficina, huur y lease di auto, gasolin pa e autonan di dienst, curso, y algun categoria mas. Den e prome rond di cortamento a corta Afl. 9.6 miyon florin. Y asina cu e ‘shelter-in-place’ wordo elimina y e hefenan di departamentonan y nan ekipo ta bek na trabou, nan lo indica unda mas por corta den e presupuesto.

Tur esaki Gobierno a haci prome cu bati na porta di sindicato pa delibera riba cortamento di salario.

Aparte di esaki, sindicatonan tabata tin mas condicionnan y Gobierno ta trahando riba nan, pero esaki ta bay tuma mas tempo.

Sindicatonan a trece nan preocupacionnan dilanti, sinembargo nan no ta riba un linea. E mayoria ta apoya e proposicion di Gobierno, bou cierto condicionnan. Dos sindicato no ta acepta e cortamento den vakantieuitkering ni bonus, mientras un sindicato no kier pa corta den salario ni vakantieuitkering, pero den e bonus so.

“Mi ta haci un apelacion un biaha mas riba sindicato pa bay di acuerdo cu e proposicion manera e ta riba mesa awor, mientras ta sigui traha riba e condicionnan cu sindicatonan a pone riba mesa. Ta hopi importante pa awor nos manda nos plan pa Hulanda, pa por bin na remarke pa e ‘zachte lening’, pues e fiansa sin interes, pa por duna un garantia di algun luna mas di salario. Si nos no tuma e pasonan aki, nos no ta bin na remarke pa e fiansa, y e ora nos no por garantisa cu tin placa mas den caha di Gobierno dentro di algun siman pa paga salario”, Premier Evelyn Wever-Croes a duna di conoce.