Dia 1 di september ta acercando pa gobierno entrega su presupuesto 2019 . Pero prome, e biaha aki parlamento lo duna contenido na un mocion cu a wordo pasa. Tambe nan lo pidi presidente di parlamento pa bin cu reglanan nobo, tanto pa e parlamentarionan y ministernan, pa evita perdida di tempo innecesario y shownan politico.

Segun parlamentario Edgard Vrolijk (MEP), luna venidero di augustus lo bay marca ‘un luna di democracia.’ Tambe nan lo pone presion pa e gobierno por presenta su presupuesto dia 1 di september, manera nos constitucion ta prescribi. “Si nos a propaganda e cambio, esey ta e prome cambio”, el a expresa.

E miembro di e fraccion di MEP a declara cu nan no kier wak show politico mas. E ta haya cu pueblo ta cansa di esaki, muy specialmente nos ciudadanonan mas jong. E situacion caminda e minister ta bin parlamento pa papia tres pa cuater ora, y den esencia tiki palabra nan a papia rond di e asunto concerni, no mag.

E ta haya cu e wega politico ta haci de reunion mas largo, sin mester. “Nos kier contesta al caso. A nos ta otro tipo di hobennan, y otro tipo di generacion cu nos kier e contesta al caso”, segun e parlamentario. E no tin di haber cu cuestion di mocion di desconfiansa, sino cu cada pregunta mester ta al caso, y esaki ta exigi un contesta al caso tambe.

Prome cu el a bira parlamentario, sr. Vrolijk a critica e proceso di democracia cu pa añanan ta tumando luga na Aruba. E ta haya cu e tempo aya, e mandatarionan na momento cu tabata presenta un presupuesto, nan tabata haci practicamente loke nan kier. Basicamente parlamento no tabata para nan. Pero cu e mocion cu a wordo pasa e tradicion politico aki ta bay cambia. Pa parlamento Vrolijk, esaki no por sigui mas, ya cu mester bin cu cambio y reglanan nobo. E ta para den su principio cu akinan, nos tin un deficiencia den nos sistema parlamentario, y mester bin cu cambionan.

Control y aprobacion

Den principio parlamento mester percura pa mantene su autoridad. Ya cu parlamento ta esun cu ta aproba presupuesto, y tambe maneho di un minister. E ta haya cu na momento cu parlamento ta aproba un presupuesto, y literalmente ta duna cada ministerio placa di pueblo, parlamentarionan mag di puntra e mandatario kico nan a haci cu placa di pueblo.

“Mi sa cu e ta un modus operandi diferente cu mucho no a custumbra cu ne, y principalmente e politiconan mas grandi”, e di.

No ta cuestion -segun e parlamentario- cu nan kier sinta den stoel di e ministernan. Pero si como parlamentarionan nan ta sinta den nan stoel di parlamento. Si parlamento ta esun cu ta aproba e placa, naturalmente y conforme constitucion, e organo legislativo aki ta esun cu mester cuestiona cada minister, pa sa kico ta nan maneho cu e placa di pueblo.

Parlamentario Vrolijk a expresa cu e ta contento cu nan a pasa un mocion, y e ta sigura cu nan ta bay duna contenido na e mocion aki. Unabes cu e reces den parlamento caba, nan lo bay yama e ministernan dilanti, unda cada mandatario tin cu responsabilisa pa nan maneho.

Tambe nan tin cu duna cuenta kico nan ta haciendo cu e placa cu a wordo presupuesta. Esta si e placa ta yega den nan presupuesto. Si den dado caso cu nan mester mas placa pa algun motibo, nan mester hustifica y argumenta esaki, te hasta preto riba blanco, locual nan mester. Si ta asina, parlamento tin cu haci nan tarea pa nan por haye tambe, si ta necesario.

“Mi ta kere cu tur esey ta parti di e madurez politico cu nan ta bin trece dilanti”, e di.

Nan ta bay manda e solicitud aki na presidente di parlamento pa e tipo di reunion aki bin. Cada minister ta para responsabel dilanti parlamento riba nan presupuesto, y con nan maneho mester a tuma luga. Den e reunion aki lo trece un debate den parlamento -segun sr. Vrolijk- riba cada minister su maneho.

Reglanan nobo

Te hasta e ta kere cu presidente di parlamento por bin cu regla nobo. El a trece como ehempel cu e parlamentario por haya 5 minuut pa formula nan preguntanan dirigi na dje, manera Hulanda. Actualmente nan ta haya 20 minuut, pero parlamentario Vrolijk ta sugeri 10 minuut strictamente pa pregunta.

“Dicon? Pasobra e no ta duna bo opcion di bin cu bo cos kens”, e di.

E parlamentario a critica e echo cu tin biaha den reunion publico, durante e debate ta wordo papia tur cos, pero menos locual ta e presupuesto mes. P’esey e ta kere cu 10 minuut ta suficiente pa cada parlamentario por formula nan preguntanan directamente y al caso. Pero tambe e ta haya cu mester bin cu regla pa e ministernan pa contesta al caso e preguntanan cu e parlamentarionan ta formula.