Bon Dia Aruba a ricibi informacion cu dump na Parkietenbos tabata na candela durante henter dia di awe. E candela a keda bira mas grandi durante dia te den atardi.
Hasta ta premira cu e candela lo crece te cu henter dump por a pega na candela durante anochi.
A pidi ayudo di ministernan Ursell Arends di Naturalesa, Rocco Tjon di Husticia y Dangui Oduber di Salubridad Publico, pero ningun a reacciona te ciere di redaccion.
Mientras tanto, un siman atras, minister di Naturalesa, Ursell Arends a anuncia un maneho responsabel pa Parkietenbos. “Tur hende ta acepta cu Aruba mester modernisa e maneho di desperdicio. Esaki ta e vision di minister Arends y awo e ta ser aplica, cu accion concreto ta pone un fin na forma primitivo di atende cu desperdicio”, segun un comunicado di gobierno.
Proximo siman, dia 22 di augustus “ta momento iconico marcando e comienso di redireccion di desperdicio, cuminsando cu e prome tipo cual ta taira.”
Den e maneho aki ta inclui cu “esnan cu ta doño di auto, ta doño di taira y ta prome pa yama pa contribui na cubri gastonan di procesa taira na un forma digno di un pais civilisa. Berdad ta nos a ‘tira nos mes den pia’ for di hopi tempo pasa door di nunca realisa cu kimamento no ta aceptabel y nunca a contribui na cubri e costo berdadero di un taira. Asina aki a causa perdida grandi cu a laga Serlimar wordo desangra. Parkietenbos y RWZI Bubali ta ‘ground zero’ di nos fayo magestral como pais pa no reconoce e problema, y di no acepta e responsabilidad pa tuma accionnan pa remedia e situacion, y asina zorg pa por procesa nos desperdicio.”
Esaki a keda sigur den evidencia mientras comunidad un biaha mas a keda confronta cu e molester di candela na dump di Parkietenbos.
