Un consehero of coordinador di un mandatario tin un rol importante ta hunga den e maneho diario di un minister. Un persona asina ta wordo scogi, sea for di seno gubernamental of priva, pa compaña e mandatario durante e periodo cu e ta goberna. E motibo: mester di hende di confiansa rond di dje (nan).
P’esey cualkier persona den un posicion asina mester percura no solamente pa su mesun reputacion pero tambe di e mandatario pa kende e ta traha y hamas por abusa di un posicion asina.
Den pasado a yega di pasa y a tuma luga ainda bou di e gobierno aki cu tin hende cu no ta realisa e seriedad cu mester tin den un posicion asina.
Recientemente tabatin un caso asina’ki unda cu “coordinador” a haci abuso di su posicion cerca di mandatarionan pa cobra alrededor di 140 mil florin for di un grupo pa duna nan un cita cu un di e mandatarionan.
Manera ta conoci, bou di e gobierno aki a papia di Integriteitskamer y tin tur e proceduranan aki andando, pa cual un mandatario lo no por acepta algo asina’ki. Nos di Bon dia Aruba por a compronde, tur esaki a sosode for di conocemento di e mandatario. Na momento cu el a haya su mes confronta cu e situacion, no solamente a confronta e persona pero tambe a pone e denuncia na e instancia concerni.
Pa colmo e “coordinador” a haci esaki den un proyecto, cu e grupo tabata interesa den dje, cu tabata den un proceso andando durante cual e mandatario (nan) no por haci nada. advertencia of mensahe bon cla pa tur esnan cu ta traha cu mandatarionan cu tipo di cosnan asina no ta tolerabel bao di ningun circunstancia. Tur persona mester cana e caminda corecto pa haya cita cu gobierno of un minister.
E instancianan concerni lo mester cana su caminda awo. Y e instancianan aki tambe mester tin personanan confiabel cu na momento un caso drenta, e informacion keda den ceno di e instancia cu keho a keda entrega y no saca esaki afo di tereno di trabao. Ministerio publico tin hopi trabao pa haci tanto paden y pafo di oficina.
