Procurador-General di Aruba, Alexander van Dam, ta un di e personanan cu a hiba palabra durante e conferencia di Fundacion Hende Muher den Dificultad (FHMD) na ocasion di e Dia Internacional contra Violencia contra Muhernan.
Den su speech e Procurador-General a enfatiza e importancia di cooperacion riba termino largo entre e partnernan riba tereno hudicial y social den prevencion di violencia relacional.
Ministerio Publico tin un rol importante den esey, pero no por solucione su so.
E ta un question cu henter Aruba tin cu traha na dje.
Ministerio Publico ta no solamente castiga personanan cu a comete violencia relacional, pero ta tambe traha pa evita cu nan ta ripiti nan hechonan.
Sinembargo, Ley Penal ta e ultimum remedium, den sentido cu husticia ta solamente drenta aden si nada otro a funciona.
Ministerio Publico ta actualmente trahando na revisa e maneho di agresion relacional, y bin cu richtlijnnan (liñeanan di maneho) nobo, cu ta bay conta tambe pa polis.
E intencion di e richtlijnnan nobo aki ta pa Ministerio Publico y Cuerpo Policial di Aruba por reacciona cu mas eficiencia y efectividad riba violencia relacional.
Banda di dje ta trahando na realizacion di Veiligheidshuis, manera anuncia na inauguracion di e edificio nobo di Ministerio Publico.
Trabaonan ta andando y e expectativa ta cu Veiligheidshuis lo ta operacional dentro di corto.
E Veiligheidshuis tambe ta un forma di cooperacion entre partnernan hudicial y social.
