Ministerio Publico a cuminsa cu investigacionnan formal pa asina haya sa di cualkier actividad criminal cu lo a tuma luga den pasado na Oil Trading Bonaire (OTB) por medio di departamento di investigacionnan policial nacional (Rijksrecherche).
Investigacionnan a cuminsa oficialmente desde cu gobernador Edison Rijna a entrega un keho oficial na e organo di persecucion tocante posibel malversacion di fondo na e compania cual ta propiedad di gobierno. Mientrastanto gobierno a suspende e director financiero sospecha di a comete e actonan ilicito. Nan a dicidi tambe pa no renoba contract cu e actual director interino Lauffer.
Ayera conseho ehecutivo a dicidi di apunta Jos Hillen, director actual di Flamingo Airport, pa sirbi alabes como director interino di OTB pa un periodo di 6 luna. Conseho ehecutivo a pidi gobierno Hulandes pa asina ofrece un consehero cu lo yuda reorganisa OTB y garantisa cu e compania yega su metanan, primordialmente provee e isla cu combustibel.
