Ayera un medio di comunicacion local (Solo di Pueblo) a publica un articulo cu e titulo “Tin un otro ex-minister di AVP cu a bira sospechoso di husticia” na unda a trece dilanti un informacion cu ta bisa cu “Ministerio Publico muy pronto lo por bay haci otro anuncio grandi, esta cu un otro ex-minister y actual parlamentario tambe a bira sospechoso di husticia, dor di hortamento di fondo publico.”
Bon Dia Aruba a tuma contacto cu Ministerio Publico pa haya mas informacion tocante e anuncio cu e medio local a publica. Ann Angela, vocero di Ministerio Publico a confirma cu e publicacion aki ta incorecto, den sentido cu no tin actualmente un caso hudicial contra un minister mas.
“No tin ningun otro ex-minister como sospechoso. E ex-ministernan den investigacion ta señor Sevinger, señor Oduber y den pasado (mientras tanto den hoger beroep) señor Croes.”
Den e articulo e medio menciona ta referi na e relacion cu ex-minister Richard Arends tabatin cu Refineria di Aruba NV, unda aspecto manera su salario y e clausula den su contrato cu lo a dun’e miyones den caso di retiro, ademas ta existi un rapport cu ta señala cu tabatin ladronicia y conflicto di interes den Refineria di Aruba (RDA), cu ta di conocemento general caba, ademas . Sin embargo, e medio no ta bisa directamente cu e lo ta e proximo ex-minister cu lo haya problema cu husticia. Bon Dia Aruba a acerca sr. Arends pa scucha di su banda encuanto e acusacionnan aki, y a haya un respuesta di parlamentario Arends, na unda el a contesta cu “mi no ta reacciona riba articulonan den Solo di pueblo y tampoco ta sinti mi mes aangesproken como cu ami no a maneha e empresa ni tampoco tabata tuma decision”.
Tambe el a indica cu ta “hopi peculiar cu despues di 3 aña e famoso rapport forensico riba RdA a keda cla algun luna prome cu eleccion. E contexto den cual e rapport a wordo traha ta pas den e liña di un campaña di difamacion di un contrincante politico. Despues di a wordo acerca pa coopera na e investigacion aki na 2020, mi no tabata tin necesidad pa atrasa ningun marcha. Mi interes hustamente tabata pa coopera pa aclaria hopi punto cu tabata wordo treci dilanti”, Arends a sigura.
Un investigacion forensico obhetivo no por depende di cooperacion niun hende pa e wordo haci. Contestanan tabata wordo duna den e terminonan acorda, pero a ripara cu e investigacion aki tabata sirbi solamente metanan politico, segun loke Arends a afirma.
Un maneho diferente den un empresa estatal despues di cambio di gobernacion, no ta nifica cu e maneho di e accionista of directiva anterior tabata robes, “si mi sigui prome-minister su argumentacion: ora ta trata otro ta ‘mismanagement’; pero e gastonan y compromisonan cu nan mes ta haci, si ta ‘hustifica’ manera e.o. contrata bufete di abogado of exonera un operador pa su debernan contractual”, el a finalisa.
E ex-ministernan den investigacion na e momentonan aki cual Ministerio Publico ta indica ta Benny Sevinger cu tabata den Gabinete Mike Eman I y II sospechoso principal den Caso Avestruz, Otmar Oduber cu tambe tabata den e mesun Gabinete Mike Eman I y II, a fungi como minister di Gabinete Wever-Croes I pa dos aña y ta sospechoso principal den Caso Flamingo, y Paul Croes cu tabata minister den Gabinete Mike Eman II, sospechoso principal den Caso Ibis.
