E departamento Ehecucion y Documentacion Hudicial di Ministerio Publico a cobra mas di 2 miyon florin (Afl. 2.132.905) na 2016.
Esaki e departamento ta informa den su relato. E suma segun nan ta un tiki menos cu 2015, e aña cu Ministerio Publico a cobra mas cu 2,2 miyon florin (Afl. 2.280.609). E placa aki ta procedente di cen ricibi for di transaccionnan, di sentencianan hudicial y incasso door di CEA di boetnan cu tabata atrasa. E ta procedente tambe di e gastonan pa e carta di buena conducta. E diferencia entre 2016 y 2015 ta hinca particularmente den e sumanan total di transaccion. Na 2015 a cobra alrededor di 1.3 miyon florin na boetnan, mientras cu na 2016 tabata casi 1.2 miyon florin.
Ministerio Publico ta haya cooperacion di CEA (Cuerpo Especial Arubano) ora di cobra boetnan cu ta habri ainda. Na 2017 tambe CEA lo sigui cu esaki. Cobramento di boetnan lo sigui na e mes manera cu den añanan anterior, caminda personanan cu tin boetnan habri ta wordo bishita na cas pa CEA.
