Ayera atardi, Ministerio Publico di Aruba a informa mediante un comunicado cu nan a dicidi pa retira e apelacion contra e absolucion (vrijspraak) di e sospechoso A.J.R. den e asesinato di John A. ‘Poentje’ Castro riba 22 di december 2010.
Corte den Prome Instancia a duna R. vrijspraak riba 24 di mei 2022—casi 12 aña despues di morto di Castro—debi na falta di prueba. Ministerio Publico a bay den apelacion contra e decision aki di hues, pero awor, despues di a bolbe studia e sentencia, Ministerio Publico a dicidi pa conforma.
E motibo pa esaki ta cu e dossier actual no tin suficiente punto di referencia pa por yega na pruebanan legal y convincente den e caso.
E caso “Apollo” lo keda un ‘cold case’ y si na cualkier momento den tempo surgi mas prueba, esaki lo wordo habri di nobo.
Ministerio Publico a reuni awe cu famia di difunto Castro y a pone nan na haltura di e decision.
E homber A.J.R. ta sirbiendo actualmente un castigo di prizon den un otro caso.
Caso Apollo a culmina dia 24 di mei di aña pasa, unda comunidad a conoce e resultado di un di e casonan di asesinato mas polemico di e isla, caminda e unico sospechoso cu tabatin a wordo declara liber y Ministerio Publico a sali dilanti pa pidi disculpa pa perde e rapport oficial di e caso aki y nan tambe a menciona cu a e investigacion no a bay manera mester ta.
Den oranan di mainta di dia 23 di december di aña 2010, a haya e curpa sin bida di e periodista y presentador John A. Castro, miho conoci como “Poentje Castro” den su cura di cas, examen patologico a conclui cu el a fayece pa via di perdida di sanger como resultado di dos perforacion di bala na su curpa.
Varios testigo den bisindario a wordo scucha na aña 2010 como parti di e investigacion, nan a afirma cu nan a scucha zonido di tironan e anochi anterior 22 di december di 2010. For di punto di bista di ekipo di investigacion na e momento ey, nan a conclui cu e victima a wordo asesina e anochi anterior cu balanan di arma di candela.
E investigacion den bisindario tambe a resulta den e recuperacion di e secuencianan di videonan graba e anochi di 22 di december pa camaranan di siguridad ubica na un compleho di apartamento, cercano na e cas di Castro. Despues e imagennan di e video a mustra esun cu tabata sospechoso ta di inicialnan (A.J.R).
Teniendo na cuenta cu no ta existi ningun prueba forensico cu ta ubica A.J.R den escena di e crimen, Corte di Prome Instancia ta indica cu mester existi otro pruebanan mas fuerte pa señala cu A.J.R. a comete e delito cu nan ta acusa di dje.
E hecho cu A.J.R a duna su declaracion pa su presencia den e bisindario unda e crimen a tuma luga no por wordo confirma pa testigonan (e tabata na e luga pa cumpra heroina), pero esey no ta nifica cu e declaracion por wordo califica como falso. Pa lo cual, no por wordo usa como un prueba legal.
Pa finalisa, Ministerio Publico a persigui A.J.R sin e pruebanan suficiente pa por confirma su culpabilidad; unico prueba concreto cu nan tabatin ta cu A.J.R tabata den bisindario e dia y ora cu Ministerio Publico ta sospecha cu Castro a wordo asesina, pero no tin ningun prueba forensico di e ora precies cu Castro a fayece.
E rapport di tur e testigonan ta contradeci e hipotesis di Ministerio Publico. Loke tambe a hala atencion ta cu nan a acusa A.J.R. di asesinato premedita, pero nan no a presenta ningun prueba si e tabatin planea pa mata Castro, Loke Ministerio Publico no a contesta ta con e rapport di un di e casonan mas grandi despues di Natalee Holloway a wordo perdi y a laga hopi mas pregunta cu contesta, solamente nan a pidi disculpa.
