Den medionan di comunicacion, a start un confusion tocante e hecho cu supuestamente lo a debolbe cosnan cu lo a wordo tuma den beslag cerca sospechoso Paul Croes.
Ministerio Publico ta haya hopi importante pa aclara e confusion aki pa medio di un comunicado di prensa.
A pesar cu nan a reconfirma e noticia aki cerca Bon Dia Aruba caba, cual por lesa den nos edicion di awe 15 di juni 2017. Nan ta confirma na Bon Dia tambe cu ayera tabata tin detencion di un otro sospechoso inicialnan T.Y.C. den e caso aki. E persona aki posiblemente ta doño di supermarket Cheng’s na Noord, pero esaki no ta confirma ainda.
Durante e investigacion IBIS, hues-comisario a tuma cosnan den beslag na Bestuurskantoor, bao di cual cosnan for di oficina di sospechoso Croes. Recientemente algun di e cosnan cu a wordo tuma den beslag na Bestuurskantoor,a wordo debolbi na Bestuurskantoor. Bao di e cosnan aki tin algun USB-stick, computernan, laptopnan y un telefon blackberry. Si algun di cosnan aki a wordo duna na sospechoso Croes door di Bestuurskantoor of den nomber di Bestuurskantoor, no ta conoci na Ministerio Publico, ni e ta responsabilidad di Ministerio Publico tampoco, segun nan ta informa.
E cosnan cu hues-comisario a confisca den e investigacion IBIS den cas di sospechoso Croes,no a wordo duna bek na Croes. E cosnan aki ta sigui den beslag segun reconfirmacion di Ministerio Publico.
Cosnan cu a wordo tuma den beslag na benificio di ‘waarheidsvinding’ den un investigacion, ta wordo debolbi asina cu e investigacion riba e cosnan ey ta cla. Cu cosnan a wordo debolbi na un sospechoso durante e investigacion penal no ta bisa nada tocante e sospecho of e resultadonan di e caso penal. E ta nifica unicamente cu e investigacion riba e cosnan specifico ey ta cla.
Relato di prensa di Ministerio Publico
