Ministerio Publico (OM) a declara cu nan no ta bay reacciona riba abogado di un sospechoso via prensa. Esaki nan contesta ta riba preguntanan di Bon Dia Aruba en conexion cu declaracionnan haci di e abogado Marije Vaders cu ta representa minister suspendi Paul Croes den e caso di corupcion cu permiso.
E abogado a declara na NoticiaCla cu e ta haya e `actitud di OM riba e caso Paul Croes hopi straño’. E ta splica cu te awor e no ta ricibi niun documento for di OM di e caso di su cliente.
Sra. Vaders tambe a bisa cu e no ta comprende pakico Ministerio Publico ta dal asina hopi buelta y si berdad tin algo di prueba riba e minister, segun e fuente.
Bon Dia Aruba a puntra vocero di OM a basa di e declaracionnan di sra. Vaders kico ta e motibo cu no a duna niun documento ainda. Pa cual el a contesta: “Nos no ta reacciona riba abogado di un sospechoso via prensa.”
Desde dos luna atras Aruba a keda den un shock cu e investigacion grandi cu awor ta carga e nomber IBIS unda ta sospecha entre otro minister Paul Croes di corupcion na un forma pasivo y/of activo. Durante tempo tin varios detencion cu a tuma luga di tanto ambtenaarnan como hendenan cu ta traha manera tramitado.
Tuma na cuenta cu a pasa algun tempo y tambe declaracionnan haci na algun medio di comunicacion pa abogado Vaders kende ta representa e mandatario, Bon Dia Aruba a acerca OM tambe pa asina haya sa kico e status ta e investigacion ta aworaki.
Den e ultimo detencion cu a tuma luga caminda a detene tres persona a wordo declara, un biaha mas esaki ta relaciona cu corupcion. Nos a puntra OM kende exactamente ta e persona(nan) cu ta wordo sospecha di a tuma e soborno.
E contesta ta cu ta trata di e minister Paul Coes y tambe ambtenaarnan cu a wordo marca den e investigacion manera su complicenan.
