Dia 12 di juli ultimo, Corte di Apelacion a duna sentencia den Caso Avestruz, castigando sospechoso principal, ex-minister Oslin Benito Sevinger cu 4 aña di prison, di cual 3 condicional, y un prohibicion di cinco aña di eherce funcion publico. Ayera, Ministerio Publico a indica cu no ta bay apela e sentencia aki.
Den e mesun sentencia, Corte di Apelacion a declara liber 4 di e 7 sospechoso den Caso Avestruz: Damira Nuñez, Edgar Werleman, Carlo Mansur y Curt Harms.
Pa loke ta trata Maria Leoncita Arends, fiscal a señala cu el a ser declara culpabel pa estafa y soborno di funcionario publico, den caso aki Sevinger. Den prome instancia Arends a ser declara liber pa soborno di funcionario publico y Ministerio Publico a apela esey, cu na final den sentencia di apelacion hues a indica cu a haya suficiente prueba cu a duna placa na Sevinger pa haya algo a cambio, den caso aki, erfpacht.
Apelacion a duna 24 luna di castigo pa Arends, di cual 12 luna ta condicional cu un tempo di prueba di 3 aña.
Pieter Susebeek tambe a keda condena pa soborno y labamento di placa di 1.3 miyon dollar. Den apelacion el a haya sentencia pa soborna un funcionario publico, den caso aki Sevinger, un sentencia di 30 luna di e cual 10 ta condicional cu un tempo di prueba di 3 aña.
Ayera, vocero di Ministerio Publico (OM), Ann Angela a informa noticiero online NoticiaCla cu “Despues di e studia cuidadosamente y cu atencion e decision di Hof den e caso Avestrus, OM a dicidi pa no bay den casacion.”
Mientras tanto, NoticiaCla a haya confirmacion cu Sussebeek, Arends y Sevinger si ta bay apela nan sentencia. Sinembargo, segun OM, Casacion no lo considera e hechonan di e caso di nobo, sino lo considera e proceduranan legal y si e decision di Hof ta bon motiva.
