E siman aki bastante atencion a bay na un denuncia tocante independencia, o mas bien falta di esaki, di Ministerio Publico. Un fiscal lo a bisa cu si tene e ex-ministro actualmente encarcela, den prison mas tempo, su partido ta rabia. Si en cambio lag’e bay cas, pendiente su caso, anto partido grandi den actual gbierno demisionario ta rabia. E periodistanan denunciante den nan show radial a bisa ademas cu nan tin e expresion graba, loke por ta berdad pero nos no a scucha esey. Y si ta berdad mes, kico tabata e contexto den cual a usa tal formulacion? Nos no sa y no a duna claridad tampoco. Te asina leu e caso ey, cu no ta proba nada. E mesun palabranan cualkier otro persona por a pronuncia, refiriendo na e hecho cu semper lo tin un partido ‘rabia’ cu cualkier cos cu Ministerio Publico bisa o haci. Y de paso por a añadi na e frase aki: “Y ta pesey Ministerio Publico no por, no mag, haci caso di ningun di nan.”
Den henter e asunto aki cos a bay asina leu cu hasta e propio Procurador General a haya pregunta di prensa al caso despues di su bishita na Formador y na e dos partidonan cu ta preparando pa bay goberna hunto. Y el a contesta loke por a anticipa di su banda. Cu si ta posible, anto pone Ministerio Publico mas na distancia di gobierno cu awor e ta. Y esey ta posible tambe, a traves di saca nombramento di personal di e entidad gubernamental aki completamente for di man di politica.
Masha bunita, por ta e reaccion di algun lector, pero no a contesta e pregunta si sa tin influencia politico den e entidad hudicial aki. Nos no ta guardian di e medionan cu persona na ambos banda tin na nan disposicion, telefon, e-mail, whatsapp y conversacion en persona, pero naturalmente un ministro di husticia y un procurador general regularmente lo consulta otro riba temanan cu nan trabao y responsabilidad ta exigi. Y si den e encuentronan ey un mandatario bay un poco mas leu cu su trabao ta requeri, sigur den un caso individual y actual, ta na e propio procurador pa bisa e ministro, di forma firme pero respetuoso, cu e ta opta, pa motibonan obvio, pa no reacciona riba loke a trece dilanti, punto. Cu consecuencia cu nos lo no haya sa si tal asunto a yega di bin dilanti den nan reunionnan rutinario o extraordinario. Pasobra si un ministro mester yega asina leu di kier duna instruccion, e lo mester haci esaki riba papel, palabra papia ta biento, y unavez e ta riba papel e por haya copia, y ‘cria pia’ manera nos ta bisa na Papiamento crioyo. Ademas cu e documento lo mester bay cana e caminda legal corecto, loke ta inclui envolvimento di Corte di Husticia.
Sin embargo, loke nos ta mira den medionan di comunicacion na e momento aki ta diferencia grandemente di e situacion tempo cu e promer di e casonan grandi envolviendo un ministro como lider di gang a cumnza. E ministro presidente di e tempo ey tabata di e mesun partido y un di su promer reaccionnan tabata cu nan tabata na altura di e travesuranan di e ministro y cu a adverti e persona ey pa e stop cu su practicanan. Obviamente e no kier a tende, cu tur e consecuencianan cu a bin pa su persona despues. Pero en todo caso e tempo ey no tabatin ningun acusacion cu Ministerio Publico tabata actua di manera no debido, y tur cos a anda manera mester ta, esta cu ta hues comisario tabata dicidi si encarcelacion ta hustifica, y te ki punto. Asina e ex-ministro por a recobra su libertad, despues di cual e caso a bay corte di Promer Instancia y ta actualmente den fase di apelacion na Corte di Husticia Comun di e Islanan.
Awor tin dos caso mas cu nomber bunita di pahra na caminda, pero ta e partido politico opositor grandi ta den gobierno. Igualmente ta hues comisario ta dicidi, y a dicidi tambe den e caso Avestruz cu e actual parlamentario mester a bay KIA pa 60 dia. Por splica unda e influencia politico ta? Nos mester supone cu e gobierno actual, contrario na esun anterior, tin hasta influencia riba hues comisario? Cu otro palabra, ta henter e aparato hudicial anto ta contra e partido social-cristian? Y tur esaki bao influencia di e partido rival den gobierno? O e caso ta simplemente cu di e manera aki e medionan di comunicacion liga na e partido ta trata na crea un ‘issue’ unda no tin? Lo ta recomendable si nos tur ta mantene e linea di sigui e curso di evento cu cualkier caso mester tuma, y investiga y analiza bon si e proceso ta cana bon. Esaki sigur pa loke ta e derechonan di e persona sospecha di delito.
Pero, por si acaso nos no a ripara, e riendanan di e casonan aki ta firmemente den man Hulandes. Desde e caso Ibis sigur e Madre Patria a dicidi cu ta basta cu corupcion y criminalidad grandi den politica. Lo ta bon pa comunidad tambe convence cu esey mester apoya den un estado di derecho, cu ciudadano apoyando e estado aki como esun cu nan kier biba aden.
