E abogado na Aruba cu ta representa Setar tambe a declara cu awor cu e investigacion ta asina leu lo bay haci denuncia na husticia contra e personanan cu a estafa e compania di telecom pa miyones di florin. Sinembargo husticia te awor tampoco a confirma cu nan a ricibi e denuncio aki.
E caso a asombra hopi hende, entre otro pasobra un medio di comunicacion di afo a bin cu e noticia. Mientrastanto e compania estatal mes y gobierno ni husticia a informa publico cu nan tabata investigando un caso grandi cu tambe lo por tin su consecuencia pa productonan bendi pa consumidonan. Aunke Setar ya a declara cu consumidonan no mester tin miedo cu lo afecta nan. Sinembargo clientenan den social media ya a expresa nan preocupacion y duda tambe den locual Setar ta trece dilanti pa motibo cu nan a tarda di trece e informacion dilanti.
Otro preguntanan clave tabata dicon Setar no a denuncia e caso na Ministerio Publico pasobra den e publicacion den e medio Miami Herald por lesa cu probabelmente ta trata di soborno. E echo cu awor e mandatarionan encarga cu e compania estatal y Setar mes a declara publicamente cu nan a actua a base di conseho di fiscal cu polis, ta uno remarcabel como cu e instancianan aki ainda no a bin dilanti. Bon Dia Aruba ta keda purba na Ministerio Publico pa asina haya contesta riba e pregunta si ta berdad cu nan a conseha e compania di telecom y gobierno pa warda cu nan denuncio y haci un investigacion interno prome.
