Dialuna 24 di juni pa 8:30am, e cuatro periodista sospechoso ta bay presenta na Corte di Prome Instancia unda nan ta ser acusa di soborna un funciona publico den funcion di Cuerpo Policial cu un regalo of promesa, cu meta pa pon’e haci of keda sin haci algo contra deber di su trabao.

E sospechosonan di inicial R.P.L, B.L.R.K, N.E.A.G y N.M.Q.C.d.A. ta acusa di, for di periodo di prome di januari 2021 te cu 22 di maart 2023, conhuntamente intencionalmente a viola secretonan cual nan tabata sa cu e ambtenaar, relaciona cu su funcion, tabata obliga pa tene. Nan ta wordo acusa di, den e periodo ya menciona, a participa den un organisacion cu tabata consisti di un y/of mas otro persona cu tabatin como meta pa comete crimen, esta, corupcion di un ambtenaar y/of tuma y/of duna soborno y/of maluso di funcion y/of violacion di secreto di trabao.

E elemento ‘organisacion’ ta e definicion cardinal di e articulo 2:79 di Codigo Penal di Aruba. Sin

participacion no tin organisacion. Segun e articulo aki, pa por bisa cu e ta un organisacion criminal tin cu cumpli cu tres criterio: tin un cooperacion mutuo entre e sospechosonan, tin un cierto structura y mester tin un continuacion. E organisacion aki su structura no mester ta grandi, mester tin minimo dos sospechoso y no necesariamente e sospechosonan den organisacion mester conoce otro, ademas door cu ta un organisacion criminal nan no tin exigencianan pa cumpli ni ta mara na tempo di existencia, y no mester tin deliberacion, e unico intencion di e organisacion ta pa comete actonan criminal.

E caso aki a bin dilanti despues di e caso penal New York di ex-polis R.V. a cuminsa, caminda na maart 2023, a bin haya varios laptop y portofoon na cas di V. E portofoonnan aki tabata conecta na e laptopnan.

For di investigacion di BIV (Bureau Integriteit en Veiligheid di Cuerpo Policial di Aruba) y investigacion tecnico a sali cu periodistanan a duna V. ekipo y software pa usa pa difundi comunicacion policial na un manera integral. Ta p’esey cu V. a ser acusa di a transmiti informacion policial na varios periodista di newssites conoci na Aruba durante varios aña, por lo menos mas cu dos aña. For di e dossier di e caso ta sali cu el a ricibi sumanan di placa y regalonan a cambio.

Na e momento ey, Ministerio Publico a informa cu nan a scucha e 4 periodista aki como sospechoso y nan no a dicidi si lo persigui nan penalmente; awor e caso aki ta bay cuminsa dialuna 24 di juni.

Den total casi 10 miembro di cuerpo policial a perde nan trabao den pasado caba pa acepta soborno for di miembro di prensa na Aruba a cambio di informacion policial pa duna noticia.