Ministerio publico a pidi pa ex-presidente di Brasil Luiz Inacio ‘Lula’ da Silva haya sentencia di prizon, cu regimen di encarcelamento, pa delito di “corupcion pasivo califica,” asina polis a splica.
E solicitud tin documento cu a ser manda pa hues federal Sergio Moro y tin relacion cu un acusacion penal, caminda ta acusa Lula di sconde un di su propiedadnan, pero e propiedad aki ta bao nomber di algun empresario, cu a actua como ‘testaferro’ di Lula.
E apartamento, un triplex situa na balneario di Guaruja, na costa di Sao Paulo ta figura den registro di propiedad di Brasil como un apartamento cu ta pertenece na empresa OAS, un di e empresanan constructor cu ta den e scandal, cu a sucode na e empresa di estado di Brasil, Petrobras.
Lula, ta un di e lidernan mas popular di Brasil, y el a goberna entre 2003 y 2011. Awor e mester responde dilanti tribunal pa otro 4 acusacion penal y fiscalia a presenta un otro denuncia, cu ta number 6 na su contra pa diferente otro acusacion. Mayoria di acusacion contra Lula ta relaciona cu e conspiracion di corupcion na Petrobras.
E caso cu ta relaciona cu departamento di Guaruja ta e caso mas adelanta contra Lula. Autoridad ta pensa cu hues di e caso aki, lo duna un condena na Lula den proximo luna.
Lula a nenga cu e ta e doño di e apartamento aki, y el a bisa cu ta un victima di un “persecucion hudicial”, cu tin como obhetivo evita cu Lula por participa di nobo den eleccion di presidente cu ta planifica pa luna di october 2018. Fiscalia ta sigura cu tin hopi prueba contra Lula y a pidi na husticia un condena di prizon pa e ex-presidente di e empresa di construccion OAS, Leo Pinheiro y cinco ex-directivo di e empresa aki tambe.
E acusacion ta basa riba e argumento cu e propiedad (apartamento) a ser duna na Lula y su famia como parti di e recompensa pa algun maniobra e ex-presidente a haci tempo cu e tabata na poder, pa asina e empresa haya algun contrato miyonario di obra adhudica di Petrobras.
