ORANJESTAD – Diaranson ultimo procurador general di Aruba Alexander van Dam y Fiscal General di Colombia Nestor Humberto Martinez Neira a firma un Memorandum di Overeenstemming (MOU) entre Aruba y Colombia na Bogota. Esaki a tuma luga den presencia di representantenan di Embahada di Reino na Bogota.
E firmamento di e MOU entre e paisnan ta un momento importante pa ambos pais.
Ministerio Publico di Aruba ta pone hopi balor na mantene un bon relacion cu autoridadnan Colombiano. Relaciona cu esey tanto Aruba como Ministerio Publico di Colombia a hala stapnan grandi e ultimo añanan, pa estrecha e lasonan hudicial y di polis entre e dos paisnan.
Fin di aña pasa procurador general di Aruba Van Dam a firma un MOU cu e procurador general di Colombia Fernando Carillo Flores. Na Colombia ta diferente cu na Aruba: ey ta e procurador general y Fiscalia General hunto ta responsabel pa e tareanan cu aki na Aruba ta cay bao Ministerio publico.
E MOU-nan ta dirigi riba reforsa y desaroya e cooperacion entre Ministerio Publico di Aruba y procurador general y fiscalia general di Colombia den e lucha contra crimen organisa internacional, particularmente contra traficacion di droga, labamento di placa y mensenhandel.
E cooperacion aki ta den forma di entre otro, rechtshulpverzoeknan (asistencia huridico) di ambos banda.
