Yolanda Pronk, fiscal di Ministerio Publico a duna di conoce e cifranan di hende cu a haya boet y a keda deteni pa no cumpli cu toque de queda y shelter in place.
Pa cu esaki, Pronk a specifica cu te diamars anochi, un total di 355 persona a wordo deteni a haya un boet. Di tur di nan el a menciona cu 13 persona a paga e boet full y 34 persona a haci un areglo di pago, loke ta nifica cu e resto no a paga ainda.
Pronk a recorda cu tur e personanan aki tin dos siman pa por paga e boet. Ministerio Publico ta cera pero e persona por haci esey via banco online, riba e pagina di Facebook di OM tin un flyer cu tur e informacion cu e persona mester y su procedura.
Di mesun manera, Pronk a informa cu si e persona no lo paga e boet, e caso lo mester bay dilanti corte y e ora ey normalmente fiscal ta pidi pa hues impone un boet mas halto. Si e hues haya cu tin suficiente prueba e por bay di acuerdo cu fiscal. Si despues cu e hues a dicta sentencia y no paga e boet mas halto, na e momentonan ey e persona si mester bay cera.
