Ministerio Publico: Caso di crimen di señora di edad ta bao investigacion

Den cuadro di e caso serio cu a tuma luga dia 23 di Maart caminda un señora di edad a fayece di un manera straño, ta indica cu un crimen a tuma luga y segun vocero di Ministerio Publico, Ann Angela, e curpa a wordo hiba Hulanda diabierna cu a pasa pa asina determina exactamente kico a sosode.

Vocero di KPA, Liliana Rasmijn ta conta Bon Dia cu Sra. Boekhoudt di 73 aña di edad lo a bira malo na su cas y el a wordo transporta pa hospital caminda el a fayece un rato despues. E dokter cu a wak e pashent a bisa cu el a mira cierto parti di su curpa tabata blauw. Un sospechoso, di inicial M.A.B. di 50 aña di edad cual tambe ta sobrino di e señora cu a fayece a wordo aresta riba e mesun dia.
Diabierna cu a pasa, e curpa a wordo translada pa Netherlands Forensic Institute (NFI) na Hulanda.

”Esaki ta un instituto cu nos ta haci uzo di dje pa haci investigacionnan entre otro di autopsianan cu ta mas complica ora cu na Aruba mes e patologo no por saca afo kico precies a pasa. Akinan nos por manda muestra of hasta henter e curpa, y den e caso aki henter e curpa mester a bay”, sra. Angela ta splica Bon Dia.

Resultado di autopsia y motibo di crimen
E autopsia a tuma luga y e resultado ta conoci, pero fiscal no kier bisa nada di esaki ainda pa motibo cu e ta hopi importante pa e investigacion. E curpa ta bay bin bek Aruba pronto pa e famia por dera e difunto.

E motibo pakico a resalta cu esaki ta un crimen, fiscal tampoco kier comparti ainda pero Bon Dia ta bay keda pendiente cu esaki pa ora tin mas informacion.