Mientras un ola critica a bin for di comunidad despues Mervine Baptiste (Blacky) a gana e corona di Soca Monarch 2017 diasabra pasa, Ministerio Publico ainda no a dicidi si lo persigui Blacky pa violencia domestico.
Segun e vocero nan ta wardando ainda riba e proces-verbaal. Polis a detene Blacky fin di januari pa motibo cu su pareha a acus’e di maltrato. Despues husticia a lag’e liber. For di momento ey critica a bin cu e persona aki no por presenta na e evento di carnaval, asina cu e no ta duna un bon ehempel. No ta prome biaha aparentemente cu e artista a maltrata su pareha. Awor tin indicacion cu su pareha a hala aden su declaracion. Sinembargo Ministerio Publico tin e derecho riba su mes ainda pa dicidi si lo persigui Blacky.
Ayera e grupo Tsunami cu a acompaña Blacky musicalmente den e Caiso y Soca Monarch a saca un relato unda ta reacciona riba e critica fuerte. No ta cla dicon nan ta tarda cu esaki como cu ya prome e evento di carnaval diasabra, tabata conoci cu polis a detene Blacky pa violencia domestico. Aki bou por lesa un parti di nan declaracion:
“E caso di violencia domestico den cual nos integrante Blacky ta/tabata envolvi a shock e famia di Tsunami y a pone nos move pa mes ora haya sa tur detaye di e caso y pa busca informacion riba violencia domestico, ya cu hopi di nos tawata tin mester di mas informacion.”
Nan ta sigui cu: “Na prome luga nos kier ta bon cla cu Tsunami y tur su integrantenan ta completamente contra di Violencia den tur su forma y specialmente Violencia Domestico. No tin ningun circunstancia, cua cu sea cu e ta, cu ta permiti un hende pa lanta man pa un otro. Bisando esaki nos no por bira lomba tampoco pa un integrante cu ta forma parti di nos famia. Ora un yiu confronta su mes den un problema un mayor nunca ta bira lomba pe y ta busca manera pa yud’e. Pa es motibo Tsunami lo sostene nos integrante Blacky den su esfuersonan pa guia profesional pa asegura cu cualkier incidente similar no ripiti. Nos no ta lagando e victima un banda, nos ta consciente cu e tambe tin mester di ayudo profesional den e caso aki.”
