Ayera mainta na Corte di Husticia a continua e caso Avestruz, unda hues for di mainta trempan te oranan di merdia a lesa e castigonan cu Ministerio Publico a exigi.
Mediante un comunicado di prensa, Ministerio Publico a informa cu nan a exigi un castigo di 5 aña di prison contra e ex-minister di Infrastructura y actual miembro di parlamento, Oslyn Benito “Benny” Sevinger.
Na opinion di Ministerio Publico, Sevinger a haci su mes culpabel di soborno, estafa di pais Aruba, abuso di funcion, labamento di placa y malversacion.
Ademas Ministerio Publico a exigi pa saca Sevinger for di e passief kiesrecht y pa e perde e derecho pa cubri cualkier puesto, pa e periodo maximal. Si Corte sigui e exigencia aki di Ministerio Publico, esaki lo ta pa un periodo di 10 aña.
Tambe ta bay cuminsa un procedura di ontneming contra Sevinger pa un total di 914.651,72 florin. Cu Sevinger a laga su mes wordo cumpra, a shock comunidad di Aruba gravemente. El a haci Pais Aruba daño y esey Ministerio Publico ta tene hopi na malo.
Ministerio Publico a exigi tambe castigonan incondicional contra cinco otro sospechoso.
Contra sospechoso P.T.A.S. cu ta ex-ambtenaar di DOW, Ministerio Publico a exigi un castigo di prison di 4 aña pa soborno y labamento di placa. Banda di esey a pidi e verbeurdverklaring di un suma di placa di 1.3 miyon dollar cu a wordo tuma den beslag na un banco na Corsou. Segun Ministerio Publico, P.T.A.S. ta esun cu a saca e probecho ilegal mas grandi den e investigacion Avestruz. El a probecha di su relacion cu e minister y a enrikece su mes a costo di e comunidad di Aruba.
Contra e sospechoso A Ministerio Publico a exigi un castigo di prison di 3 aña y e boet maximo di 25.000 florin. A. ta wordo acusa di a estafa Pais Aruba via varios proyecto y di soborno di e minister.
Ministerio Publico a exigi castigonan di prison di 2 aña y e multa maximo di 25.000 Florin contra e sospechosonan C.R.M. E.R.W y N.D.N. Nan tambe ta wordo acusa di estafa y falsificacion. E sospechoso N. a wordo condena anteriormente den e caso Ibis.
Contra e sospechoso F.F.A. di DIP a exigi seis luna di castigo di prison. Contra e otro sospechosonan a exigi trabao pa comunidad y multanan.
Ministerio Publico a pidi vrijspraak den e caso contra sospechoso E.B.
E defensa di abogadonan di e sospechosonan lo tuma luga otro luna december. Corte lo dicta sentencia na inicio di aña 2023.
