Awe mainta, Ministerio Publico a confirma na Bon Dia Aruba cu keho penal a wordo entrega contra ex-minister Plenipotenciario, Guillfred Besaril pa malversacion di placa di Pais Aruba den e caso di Arubahuis.
Besaril su problemanan legal a bira mas grandi mirando cu aworaki su caso oficialmente ta den man di Ministerio Publico, cu ta e instancia pa persigui penalmente.
Recientemente hues den su caso civil a bay di acuerdo pa retira Besaril for di su funcion di polis, aunke e la comete abuso di su funcion den calidad di minister plenipotenciario, pero ta di opinion cu tambe por pone e straf aki den su calidad di polis.
Tambe hues a bisa cu Besaril su accionnan cu e la haci, no ta hacie apto pa traha como polis mas ni como un funcionario publico.
Reaccion
E noticia aki a genera un reaccion fuerte riba rednan social. Riba pagina di Facebook di Bon Dia Aruba, varios usuario a expresa frustracion pa cu e comportamento di e ex-minister.
Usuario M.R. a cuestiona e diferencia den reaccion di prome minister den e caso aki compara cu e caso di ex-parlamentario di POR, Alan Howell. “Anto unda Evelyn a keda pa entrega su retiro pasobra el a haci esaki momento cu partido POR a haci algo robes den man di Alan Howell, y Evelyn a bisa bon cla cu e no ta forma parti di algo asina y ta entrega su retiro. Y awe dicon no a haci mescos? Pasobra ta colega di partido MEP?”
E comentario ta haci referencia na declaracionnan di prome minister Evelyn Wever-Croes, cual Bon Dia Aruba a publica dia 13 di april 2021, den cual el a bisa: “Como gobernante, ami cu SI ta kere den integridad, no por sigui wanta na un posicion di Prome Minister, atachando e integridad di Parlamento y coalicion.” Continuando, el a bisa “E motibo cu nos a entrega retiro ta simple: nos no kier sigui goberna cu un sospechoso. E ta daña tur e imagen y bon nomber di Gobierno. Integridad ta algo cu bo tin of bo no tin.”
Di otro banda, usuario H.J. a comenta riba e caracter structural di e casonan di malversacion den funcionnan publico na Aruba, bisando “den tur dos partido esaki a pasa, dus spera hues sigui baha pisa riba nan.” Esaki ta refleha e resultadonan di e encuesta mas recien di Banco Central di Aruba riba percepcion di corupcion, publica na 2022, cu a haya cu gran mayoria di encuestado ta kere cu corupcion ta comun na Aruba, esta 92% di encuestado. Di mesun manera, 77 porciento di encuestado a considera cu gobierno no ta haciendo un bon trabao pa combati corupcion.
