Ministerio Publico mediante un comunicado di prensa a informa cu nan a ricibi durante 2022 un melding di Inmigracion indicando cu posiblemente tin BVT (bewijzen van terugkeer) falso den circulacion.
Siguientemente Ministerio Publico a duna Landsrecherche orden pa cuminsa un asina yama feitenonderzoek di nomber “Magdalena,” cu e hechonan rond di e emision (uitgifte) di BVT, caminda den e feitenonderzoek aki Landsrecherche e investiga leynan y reglanan relevante y a scucha varios testigo.
Di esaki, manera nan ta señala a resulta cu pa loke ta e autorisacionnan relaciona cu e emision di un BVT e minister envolvi ta autorisa pa saca nan y cu normalmente e minister tambe ta encarga DIMAS como departamento ehecutivo, cu esaki. E procedemento ta cu e peticion pa saca un BVT ta bay via DIMAS.
Den e investigacion aki a haya seis (6) BVT cu no a bay via DIMAS, pero via e bureau di minister y cu a wordo firma tambe pa e minister.
Nan ta señala cu e ultimo aki no ta nifica cu por conclui cu ta trata di documentonan falso, e minister ta e persona encarga pa autorisa esaki y no a resulta sospecho di ningun hecho castigabel.
Debi na esaki, Ministerio Publico a informa cu e feitenonderzoek a cera y lo no start un investigacion penal.
E minister ta na haltura di e decision di Ministerio Publico, sinembargo, e procurador general a mustr’e tambe enfaticamente riba e riesgonan di desvia di procedementonan stipula.
Door di desvia di e procedementonan aki, ta dificulta e control y e bista riba servicionan cu gobierno ta duna.
Mal uso, confusion y falta di claridad por ta drumi ta spera riba e caminda ey, loke por tin un efecto negativo riba confianza di e ciudadano den gobierno.
