Enfoca riba embeyecemento di diferente luganan di Aruba, minister di Turismo y Salud, Dangui Oduber a realisa un conferencia di prensa na Palm Beach pa anuncia un proyecto turistico nobo, cu lo tin un impacto grandi tanto pa hende local como pa turista.

Ta trata di e plataforma cu ta dilanti di Riu Hotel. Oduber a señala cu na aña 2018 nan a acerca e hotel aki pa yuda co-financia e drechamento di e toren di e plataforma e tempo ey, unda e hotel Riu a bay di acuerdo pa financia e mita di e proyecto aki. “Pero nos a nota cu den ultimo añanan debi na mal tempo y debi na tur loke tabata pasando den nos naturalesa y den nos awanan, e plataforma aki a wordo afecta severamente, casi el a wordo kibra completamente. Nos a haya necesario como Ministerio di Turismo y Aruba Tourism Authority pa percura pa busca e fondonan necesario pa por financia e drechamento di e plataforma aki”, el a señala.

Den proximo simannan lo cuminsa e trabaonan unda esaki ta bay bira un plataforma bunita. Oduber a menciona cu ta bay bira den e forma di un octagone, cu den cada skina por subi e trapi aki tambe. Nan ta bay acerca artistanan local pa haci un bunita arte caminda e toren ta. “Sigur un atraccion turistico caminda nos ta bay tin un plataforma cu ta bay ta mas sigur, locual no ta e caso na e momentonan aki, y conhuntamente cu ATA, DIP y DOW nan a prepara e proyecto aki den ultimo tempo cu ta cla pa cuminsa.”

E intencion ta pa drecha esaki completamente pa por prepara y presenta esaki na local y turista pa por haci uso di dje.

Fin di siman ultimo, minister Oduber tambe tabata presente den e AHATA Excellence Awards, unda el a gradici AHATA pa organisa e evento aki, pa reconoce tur esnan cu ta traha den industria di turismo pa brinda un excelente grado di servicio. “Nos kier felicita tambe no solamente tur nominado, pero tambe tur ganado durante e anochi aki, cu sigur nos ta sigui sostene e evento aki.”

Continuando cu su discurso, Oduber a comenta cu aña 2022 ta yegando na su fin. Tin tur indicacion cu Aruba lo yega na 100% di recuperacion economico cu nan a pone como meta, aunke e aña aki a cuminsa cu 5.000 caso di Covid-19 cu variante Omicron. Den pleno pandemia autoridadnan a anuncia un ‘Exit Strategy’ y nan a enfoca riba recuperacion di turismo, nan tabatin e confiansa y conviccion cu strategia ey lo duna resultado cu nan tabata buscando na e momentonan ey.

Aworaki, cerando luna di december e ultimo proyeccionnan ta dunando indicacion cu muy probablemente ta bay logra recupera 100% di turismo. “Locual sigur ta algo remarcabel pa despues di dos aña di pandemia Aruba a demostra un resiliencia enorme pa nos por yega back na 100% di recuperacion”, Oduber a bisa.

Minister Oduber a trece dilanti e caso di asesinato cu a tuma luga den area di hotel den fin di siman ultimo, unda el a splica cu Ministerio Publico y Cuerpo di Polis Aruba ta bay tuma accion y Gobierno di Aruba tin tur e atencion poni riba e tema aki pa loke ta trata seguridad di ciudadanonan mes y bishitantenan.

Di su parti, Ronella Croes, CEO di ATA a expresa cu e drechamento di plataforma ta un otro proyecto di e maneho nacional di turismo aproba unda riba diferente noticia den medionan local por nota cu tin di haber cu hopi productonan turistico di Aruba como parti di e maneho nacional.

“Esey ta importante pa señala, cu den evolucion di turismo na Aruba sigur bo ta mira cu e maneho ta carga un enfasis particular riba embeyece, upgrade pero tambe aspectonan di seguridad pa loke ta trata nos turismo”, Croes a sigura.

Igualmente, el a bisa cu ora e trabounan di infrastructura lo wordo finalisa tin e intencion pa reintroduci un diseño unda e lo carga e bandera di Aruba y nan lo invita diferente artistanan pa asina nan presenta nan proposicion.

“Cu esey tambe nos ta introduciendo un mural riba nos awa na e sitio aki, ta algo cu a bin ta haya atencion di ATA tambe”, el a sigura.

Durante añanan nan a midi e calidad di awa den e zona aki segun Croes a enfatisa, tambe a coloca diferente boeinan y pa aña 2023 e plan ta pa agrega un otro faceta di boeinan den area di Malmok y di Palm Beach, esaki ta pa basicamente distingui e zona unda vehiculonan maritimo motorisa unda nan por yega y unda nan no por surpasa.

Otro aspectonan cu tambe ta haya atencion ta e parti di Strandpolitie, Croes a señala cu for di 2011 ATA ta duna su aporte na Aruba Hospitality and Security Foundation y pa medio di esaki ta pone atencion na siguridad y nan a yuda e oficina di Strandpolitie cu diferente ekipo y training.

Pa 2023, Croes a anuncia cu lo wordo reintroduci un ‘Visibility team’ cu ya caba tabata den planificacion conhuntamente cu Ministerio di Turismo, entre otro instancianan pa di e manera aki por eleva nan contribucion na e topico di siguridad den zonanan cu ta hopi bishita pa turistanan pero tambe pa e comunidad mes.