Ayera mainta a tuma luga e apertura di e programa di training ‘Leefstijl’. Den un video publica ariba su pagina di Facebook oficial, Minister di Turismo y Salud Publico, Dangui Oduber, a splica kico e training aki ta y e meta di esaki.
Minister Oduber hunto cu Minister di Enseñansa y Deporte, Endy Croes, conhuntamente cu directivanan di scol, representantenan di Plataforma Scol Saludabel, docentenan di movecion y salud, IPA y otro invitadonan a inicia e training Leefstijl.
Leefstijl ta un programa educativo di un profesional Hulandes cu a bin Aruba specialmente pa duna e training e proximo cuater dianan cuminsando awe. E ta un programa cu ta stimula y guia muchanan di un edad hoben riba tereno social y emocional con pa haci escogencianan saludabel riba tereno fisico, nutricional y mental.
E meta di e programa aki ta pa empodera muchanan pa ta resiliente y ta consciente di nan escogencianan. E meta ta cu e programa aki lo ta uno structura den scolnan como un materia y lo ta uno duradero.
Minister Oduber a remarca cu den cuadro di e plan nacional di prevencion ta hopi importante pa inculca den e hobennan cu ta e futuro generacion e importancia di cambia nan estilo di bida, biba mas saludabel, come cumindanan saludabel, consumi menos sucu, menos salo y participa mas activamente na actividadnan fisico.
El a resalta cu Ministerio di Salud ta implementando e plan nacional di prevencion cu a wordo lansa algun aña atras caba y na e momentonan aki nan ta enfocando ariba cuater pilar.
Un di nan ta e Healthy Lifestyle Center cu a habri den luna di januari. Minister Oduber a indica cu na e momentonan aki tin 104 cliente cu ta participando activamente na e Healthy Lifestyle Center na unda nan ta haya coaching, guia con pa come y biba saludabel y haci actividadnan fisico.
Otro proyecto cu Ministerio di Salud ta financiando ta Jump 18 pa muchanan entre cuater y hobennan di 18 aña.
Den luna di mei Ministerio di Salud a lansa e proyecto ‘Scol Saludabel’. Minister Oduber a sigui splica cu e training cu ta bay tuma luga e proximo dianan ta un parti integral di e proyecto di ‘Scol Saludabel’.
“Nos kier muchanan mas saludabel, nos kier hobennan mas saludabel. P’esey prevencion den salud ta asina importante y nos como ministerio ta compromete nos mes pa haci inversion den prevencion di salud pa asina por tin un comunidad mas saludabel pa hisa e vitalidad, pa tin mas productividad. Esey ta e compromiso cu nos tin cu nos pais y nos futuro generacion,” Minister Oduber a enfatisa.
