Aruba Tourism Authority (ATA), ta poniendo atencion necesario pa stimula esnan cu ta traha directamente cu turismo pa nan vacuna. Sinembargo minister di Turismo y Salubridad Publico, Dangui Oduber, a informa cu for di januari tin un plan di vacunacion y nan ta manteniendo na e secuencia, y te ainda nan ta mantene na dje.
Pero nan ta considerando pa pone atencion necesario na e trahadonan cu ta traha directamente cu turismo, ya cu loke nan kier ta pa vacuna hopi hende mas di un manera mas eficiente posibel. P’esey nan ta evaluando si ministerio di Salubridad Publico ta mantene su mes na e plan strategico di vacunacion. Of si nan lo bin cu algun cambio, entre nan teniendo cuenta cu cada sector of categoria, ya sea hotelero, taxista, duanero, etc.
Ya caba a cuminsa aplica e di dos dosis na e grupo considera mas vulnerabel y prioritario den nos comunidad. E mandatario a bisa cu nan a ricibi un carta for di Ministerio di Salubridad y Medio Ambiente di Hulanda (RIVM) a duna instruccion cu prome cu nos ta caba cu e grupo di 60plus, Aruba lo por cuminsa cu e grupo di riesgo entre 18 aña y menos cu 60 aña.
Minister Oduber a declara cu si tin hende den e categoria aki, nan por bin na remarca pa haya e vacuna, eventualmente entrante e di dos lote caba of tambe pa e di tres lote cu ta na caminda. Segun nan planificacion e di tres lote di 24 mil vacuna Pfizer lo yega pa fin di luna.
Tambe el a referi cu for di esnan cu a wordo vacuna nan no a haya niun melding di algun efecto serio cu lo por ta motibo di preocupacion, sino esunnan comun, entre nan dolor di cabes, calafriu, keintura, etc… te hasta cierto hende por haya un draaimento di cabes.
Te siman pasa mas cu 300 miyon dosis di e vacuna a wordo aplica caba mundialmente, y e resultado ta uno positivo. El a referi cu e vacuna di Pfizer cu ta esun cu ta wordo duna na Aruba su resultado ta positivo. E ta duna un efectividad entre 94% cu 96%, segun e mandatario.
