Mediante un publicacion, Ministerio di Naturalesa kier recorda na tur ciudadano cu for di aña 2019 e uso di blaas di plastic den aire liber no ta permiti, tambe ta importante pa informa cu e ta causa un impacto negativo pa medio ambiente.

Ministerio di Naturalesa ta recorda tur ciudadano cu desde december 2019 e uso di blaas den aire liber, esta pafo, no ta permiti.

Landsverordening Milieu Schadelijke Producten ta nombra specificamente blaas y confetti di plastic. A tuma nota cu no a tene esaki na cuenta durante temporada di graduacion di scolnan secundario y un celebracion di campeonato di futbol.

Blaas di plastic por facilmente causa impactonan negativo pa nos medio ambiente, pues;

  1. Nan por causa daño serio na nos animalnan sea ariba tera of den awa pasobra cu nan por bruha esaki cu alimentacion. Esaki por causa nan hopi daño y hasta nan morto.
  2. Nan ta contribui na polucion ariba tera y den lama. Biento por desplasa nan den distancianan grandi y hiba nan den nos mondi y beach.

3. Nan ta laga kimico dañino los den nan proceso di desintegracion. Esaki por afecta e calidad di nos suela y awa cu contaminacion.

Ministerio di Naturalesa ta urgi Aruba henter pa stop di usa blaas di plastic den aire liber pa asina nos por cuida di nos medio ambiente. E responsabilidad pa salvaguardia nos naturalesa ta cay ariba nos tur cu ta biba ariba e isla aki, no solamente ariba algun.

Igualmente, por a recorda cu uso di blaas di helium tambe ta representa un peliger mirando e diferente incidente cu a sucede cu coriente debi na e uso di e blaasnan aki, pa esaki, ELMAR N.V a manda un mensahe na pueblo di Aruba na luna di mei ultimo cu nan kier conscientisa pueblo cu e blaas di helium ta traha di un material di aluminium.

Aluminium ta un metal conductivo, na momento cu blaas aki yega den contacto cu nan liñanan di coriente, esaki ta ocasiona un corto circuito.

Pa e motibo ey, tanto Ministerio di Naturalesa como e compania estatal ELMAR N.V ta haci un yamado na comunidad pa ora di usa blaas of blaas di plastico, no laga nan bula bay mirando e peligernan cu esakinan por ocasiona tanto pa medio ambiente, bestianan y hasta pa mesun comunidad.