Recientemente Ministerio di Naturalesa a bin ta ricibi diferente keho y evidencia di companianan di watersport cu ta viola reglamento, entre otro areanan destina pa landamento.
Segun e ministerio a splica den un comunicado di prensa, e comportamento aki ta estrictamente prohibi y ta pone un riesgo grandi na e seguridad di esnan landando/snorkel den e area y tambe pa e compania mes, cu por perde nan permiso di watersport.
Ademas di e violacion di areanan di landa, e ministerio a ricibi informacion di incidentenan unda cu tour guides ta encurasha turista pa persigui e turtuganan na por ehempel TresTrapi. Un practica cu ta ilegal y dañino pa e criaturanan protegi.
Minister di Naturalesa, Ursell Arends ta enfatisa cu e comportamento aki ta inaceptabel. Mester pone e proteccion di nos bida marino y seguridad di ciudadano y bishitantenan como prioridad.
Segun e comunicado, Ministerio di Naturalesa ta compromete su mes pa pasa e evidencianan aki na e departamentonan concerni. Asina por spera cu accion por wordo tuma pa coregi e mal comportamento tumando luga y sigura cu tur compania ta cumpli cu ley.
Operadornan di watersport mester cumpli cu reglamento y maneho di Gobierno, y evita cu lo enfrenta cu penalidad severo, incluyendo revocacion di permiso pa opera den nos awanan.
Minister Arends ta urgi tur operador di tour pa educa nan cliente- y empleadonan tocante e importancia di respeta nos bida marino y pa reforsa e regulacion cu diligencia.
Conscientisacion publico y cooperacion ta vital pa preserva e bunitesa natural di Aruba su lama unda por garantisa un ambiente sigur y agradabel pa tur hende y alabes percura pa un sector di watsersport duradero y sostenibel.
Maneho di watersport
Luna pasa, Minister Arends a splica cu dia 28 di mei ultimo, Conseho di Minister a aproba e maneho temporal pa watersport vergunning, conoci como articulo 18, cual a drenta na vigor desde dia 1 di juni 2024.
E maneho temporal aki a ser stipula a base di consehonan di Directie Scheepvaart, recomendacionnan di beach policy commissie, cu participacion di DIP, DOW, Warda Costa, Polis Maritimo, ATA y AHATA.
E mandatario a indica cu tur e partnernan ta di acuerdo cu e ley aki tabatin mester un revision completo y a bin cu cambionan den e maneho di actividad acuatico segun articulo 18 y 21 di e Ordenansa Nacional cu ta regarda e awanan y lama publico.
Minister Arends a remarca cu pa varios aña caba tin basta keho registra pa loke ta trata e ‘hot zone’ di actividadnan acuatico, na unda cu a yega na un situacion cu no por garantisa seguridad mas. Den ultimo añanan tabatin incidentenan cu resultado- y consecuencianan devastador cu a pone Aruba den un situacion internacional delicado.
Despues di e incidente lamentable na unda un hobencita turista a perde su bida den lama despues di sufri un accidente, a pone den cuestionamento e norma- y standardnan den cual operadornan di watersport ta eherce e actividadnan acuatico actualmente.
“Pa mantene Aruba su reputacion y garantisa seguridad di tur cu ta disfruta di lama, reevaluacion di e maneho tabata necesario,” el a resalta.
E mandatario a splica cu na april di 2022 a pone un paro temporal riba e peticion pa permisonan di watersport y a haci un investigacion riba e situacion actual. Tanto den aspecto di medio ambiente, como den aspecto di seguridad, ademas di e estudio ariba capacidad di carga, sostenibilidad y durabilidad di e sector.
Mirando cu esaki ta tuma hopi tempo y no ta intencion di gobierno pa perhudica e companianan existente, el a resalta, nan a tuma decision pa introduci un maneho temporal mientras ta finalisa e estudio di sostenibilidad y durabilidad di e sector aki.
E mandatario a sigui splica cu e watersportbeleid ta enfoca riba tres area principal; reemplaso, expansion y seguridad.
“E cambionan aki ta esencial pa garantisa e seguridad y sostenibilidad di actividadnan acuatico na Aruba. Nos ta kere cu e cambionan aki lo mehora e experiencia tanto pa e residente pero tambe pa e turistanan manteniendo e standardnan halto di seguridad y proteccion ambiental,” e mandatario a subraya.
