Siman pasa a tuma luga reunion di urgencia yama door di Minister di Naturalesa, Sr. Ursell Arends, pa asina ricibi clarificacion riba e ultimo desaroyo di tur departamento y stakeholders riba e situacion di Shoco na Bushiri Beach.

Minister Arends tabata kier un update di e plan di accion cu a keda implementa algun luna pasa. Ultimo informe tabata e comprendemento cu recientemente e shoconan a cuminsa familiarisa nan mes cu e area rond di e neishinan artificial cu a instala dia 7 di october, asina mustrando e movecion natural di e shoco pa nan cas nobo. E desaroyo aki tabata importante, ya cu si e proceso natural akinan no tuma lugar, lo mester a evalua si e evento, Aruba Open, lo mester a busca alternativa. A traha cu e timeline di e Shoco y no e timeline di e evento.

Despues di seis ora deliberando na mesa, yamando cu urgencia organisador aden, director interino di DIP y tur esnan envolvi pa pone riba mesa tur papel, tur dato y fecha di esfuersonan pa identifica unda tur erornan a ser cometi. Erornan cu mester drecha pa naturalesa ser respeta.

Resumen di datonan clave:

April 2024 Aruba Open ta tuma contacto cu DIP.

A intensifica e monitoreo di e neishi di Shoco na Bushiri Beach y usando tecnologia a revela cu tin webo den e neishi, pa cual motibo e evento di 1 juni a dicidi pa realoca y asina conserva e neishi di Shoco, como cu e webonan ta legalmente protegi.

Den transcurso di e neishi activo aki, DNM y ACF a bin ta monitoria e neishi di Shoco continuamente y asina duna nan conseho.

Dia 2 augustus 2024 un otro inspeccion a tuma luga cu a revela cu tin un Shoco baby den e neishi. Esaki ta parti di ciclo di bida natural ora e area aki, cual ta destina pa evento di aire liber den ROP/ROPv, no wordo manteni door di e departamentonan encarga.

Dia 12 di september e prome reunion oficial cu stakeholder a tuma luga, incluyendo DNM, ACF y organisadornan di evento. Akinan, ya caba a haci e calculacion di e ciclo di comportamento di e shoco.

Dia 7 di october a instala dos neishi artificial dentro den un radius di 100 meter cu ta rekeri pa nan sobreviviencia.

Dia 24 october construccion di e center court a cuminsa.

Dia 30 october DIP ta otorga e prercario oficialmente cu a pidi dia 27 september, pero cu condicionnan estricto.

Tur esaki asumiendo si sigui e transcurso natural di e Shoco, pa fin di october e shoconan lo bula bay. Pero esaki no a pasa, mustrando nos atrobe cu naturalesa ta traha riba su mesun tempo.

Pa fin di october e situacion di Shoco a bira un controversia, unda e dianan di e evento ta yegando y e Shoconan no a haci uso di e neishi artificial ainda, pero si a ser observa na varios ocasion den e matanan y vegetacion cu ta rondona e neishi artificial.

Durante un reunion intensivo, a involucra cinco hurista pa duna conseho riba e situacion pa salvaguardia naturalesa. Ora no a logra na mesa, Minister Arends a bisa tur envolvi pa presenta na e neishi pa unabes mas analisa e situacion y yega na un solucion.

Na e sitio a cuminsa analisa e infrastructura di e evento pa posibel realocacion, y tambe e status di e neishi. ACF a coopera cu nan tecnologia pa determina si e neishi ta uno activo of inactivo. Despues di a analisa e neishi a bin constata cu de facto e ta inactivo, loke ta nifica cu e Shoconan no ta usa e cas mas. Ta importante pa remarca cu esaki ta parti di e ciclo di bida di e Shoco, despues di seis siman cu e baby Shoco nace, e mayor adulto mes ta forsa e Shoco pa laga e cas y cuminsa bula y percura pa alimentacion propio. Esaki ta parti di nan desaroyo pa sobrevivi.

Den comunidad hopi ta puntra dicon pa esaki si por a haci esfuerso pa realoca e Shoco pa un neishi artificial. E contesta pa esaki ta cu e movecion lo tabata natural y e neishi no ta activo, mientras durante evento di 1 juni tabatin webo den e neishi cu ta nifica cu e ta completamente ‘off-limits’ y un realocacion no ta posibel mes. Tin cu remarca cu e situacion aki por a keda evita si a mantene e area designa pa eventonan riba beach pa por ehempel Shoco no traha nan neishi den santo blanco, cu no ta un neishi ideal tampoco mirando cu santo blanco no ta provee stabilidad y e neishi riba su mes por cay den otro. Esaki ta un momento importante pa remarca cu e situacion akinan ta pasa mas frecuentemente cu nos sa di dje. Nos Shoconan poco poco ta perde mas di nan espacio door di desaroyo continuo y ta busca lugarnan manera e tereno na Bushiri Beach of otro areanan na lama unda nan por traha nan cas.

Tin cu menciona si cu a comete erornan, den falta di cumplimento cu diferente punto den e prercario, cual organisadornan lo ricibi un multa. E situacion aki ta un les pa drecha e buraconan den Gobierno su sistema di permiso.

Minister di Naturalesa ta compronde cu desaroyo economico mester un espacio, cu turismo mester su espacio pero ta enfatisa cu naturalesa mester di e mesun espacio aki y cu esaki por bay den balans. Y na mesa, den e caso aki, na e neishi a yega na solucion unda tur envolvi por ta contento cune, pero mas importante cu tur, por sigura e poblacion di Shoco den e area aki.

Na final, danki na esfuersonan en conhunto a yega na un solucion unda por tin harmonia entre naturalesa y actividadnan economico. Minister Ursell Arends ta enfatisa cu e situacion aki ta un recordatorio poderoso di importancia di tin un bos pa naturalesa. Pa sigura cu e area designa pa evento aki por keda ser usa como tal, DIP y e organisador lo sinta na mesa pa yega na un acuerdo pa e mantencion di e area na Bushiri cu ayudo di departamentonan di naturalesa.

Minister Arends ta gradici tur cu a bin ta aporta na e lucha pa salvaguardia naturalesa na Aruba.