Diahuebs mainta, a trata e caso di e hoben di nacionalidad Venezolano, den gerecht in eerste aanleg pa loke ta e caso caminda a acusa Minister di Husticia y Asuntonan Social, como esun responsabel pa e departamento concerni esta; Guarda nos Costa, di no actua segun ley, y di a wanta e hoben cera contra ley.
Pa esaki, a pidi pa suspende y alabes multa e director di Guarda nos Costa. Esaki a bin despues cu ya caba a aclaria e punto di distincion cu tin entre “asilo” y “deportacion”, mirando cu ta dos aspecto diferente cu proceduranan completamente diferente pa loke ta trata e situacion aki.
Manera ya a splica, loke hues a dicidi ta cu e circunstancia di cual un persona ta wordo “opgehouden”, cu ta en espera di e parti di asilo mester ta diferente na e circunstancianan di un persona cu ta wordo “in bewaring gesteld”, kende ta en espera di su deportacion. Pa e motibo aki hues a dicta cu e persona en cuestion di e incidente cu a surgi mester a wordo laga den libertad mesora, cual a sosode tambe, pero na mes momento despues di e sucedido e persona a wordo poni “in bewaring” en espera di su deportacion.
Bisando esaki, awe huez den corte di ley a rechasa e peticion di e hoben nacionalidad Venezolano, pues a conclui cu Ministerio di Husticia y Asuntonan Social y e departamento cu ta resorta bao di dje, den e caso aki; Guarda nos Costa, a actua segun ley. Importante pa menciona cu e decision di huez ta definitivo pues no tin posibilidad pa bay hoger beroep.
