(CuraçaoChronicle) – Recientemente, manera varios medio a reporta caba, a observa cu den oranan trempan diaranson, 19 individuo a yega Corsou ilegalmente via boto na Piscadera Bay.
Entre e 19 individuonan aki tabatin 7 adulto masculino, 7 adulto femenino y 5 menor di edad. Pa haya un solucion temporario pa e menornan, e Ministerio di Husticia a instrui e agencianan relevante pa sigui cu e proceso legal y acomoda e menornan, tumando na cuenta e reglanan di International Convention on Rights of the Child (CRC).
E individuonan indocumenta a ser intercepta via boto durante e oranan tempran di mainta diahuebs ultimo. Despues cu e boto a yega costa di Corsou, algun individuo indocumenta cu ya caba tabata riba e isla a reporta na e Departamento di Inmigracion, indicando cu nan tabata e guardiannan legal di e muchanan cu a yega via boto. E individuonan aki a keda deteni bao sospecha di trafico humano. Mirando cu e ocupantenan di e boto tabata indocumenta y compaña pa 5 menor, e investigacion di trafico humano a keda inicia.
Pa loke ta trata e bienestar di e muchanan, siguiendo Ministerio di Husticia su procedura, nan a ser poni den cuido di un institucion confia y sigur pa muchanan mientras ta warda pa e resultado di e investigacion. Informacion tocante nan localidad no por ser revela pa proteha e muchanan su siguridad.
E investigacion di trafico humano ta bao investigacion y ta responsabilidad di Ministerio Publico (OM), y e pasonan necesario lo ser tuma basa riba e resultadonan. E Ministerio di Husticia lo sigui haci tur esfuerso pa proteha derechonan humano y derechonan di muchanan.
