E echo cu empleadonan di Aura Casino a bay protesta dilanti Oficina di Gobernacion contra decision di Minister di Husticia cu lo mester a otorga permiso pa e operador cera Aura Casino, ta basa completamente riba mal informacion. “Nos no ta duna permiso pa cera casino, solamente permiso pa habri y pa opera un casino. No ta compronde di unda a bay mal informa empleadonan cu nos lo a duna permiso pa e compania cera e casino”, segun Minister di Husticia, mr. Drs. Arthur Dowers a enfatisa.
Den pasado Alegro Hotel a pidi un permiso pa opera casino den e hotel, cual Gobierno a honra tambe. E ultimo añanan, un otro compania a “lease” e casino for di e hotel y consecuentemente a maneha e casino y e empleadonan. Pero na un dado momento, e operador a stop cu su trabounan y a bandona e casino, lagando e trahadonan den un situacion di incertidumbre.
“Pero ta importante pa bisa, pasobra ta reina e percepcion bou di e empleadonan, cu Ministerio di Husticia lo por tin algo di haber cu henter e asunto ey. Mester aclaria cu e rol di Ministerio di Husticia ta solamente relaciona cu otorgamento di e permiso pa opera casino, cu den pasado a duna na e hotel”, asina Minister Arthur Dowers a splica.
Locual si a sosode ta cu na un dado momento, despues cu e casino a keda mas di 48 ora cera, cu Gobierno tin e opcion pa anula e permiso. Pero, e doño nobo di e hotel a pidi Gobierno pa no haci esey, pa mantene e permiso existente, pendiente nan keda cla cu un operador nobo pa sigui maneha e casino. “Pues no ta asina cu nos a duna permiso pa cera e casino, pasobra esey no ta nos autoridad. Nos ta controla casino pa nan cumpli cu rekisitonan legal mara na nan permiso y ta solamente si faya na cumplimento eynan por trek in nan permiso”, di acuerdo cu Minister di Husticia.
Mas leu e mandatario a aclaria atrobe cu “No ta asina cu den e caso aki nos a trek in e permiso y tampoco nos a deal cu e operador di e casino cu ta responsabel pa e trahadonan. Locual a sosode ta cu a bin un disputa entre e doño di e permiso, pues e hotel, y e operador di e casino. E hotel a saca e operador afo debi cu nan no ta paga locual nan debe na e hotel, pero esey ta algo cu no tin nada di haber cu nos di Ministerio di Husticia”, manera Minister Dowers a enfatisa.
E ta haya cu e sindicato tin un rol pa splica su miembronan debidamente riba con e situacion ta hinca den otro, cu aki ta un disputa civil entre dos compania y cu aki no tin nada di haber cu Ministerio di Husticia, nada di haber cu e condicionnan mara na e permiso pa opera casino, etc. Ta sinti cu informacion robes a bay na e trahadonan, locual ta masha di lamenta.
P’esey ta enfatisa cu Minister di Husticia ta controla casino y no tin nada di haber den e relacion entre doño di trabou y nan trahadonan. Minister Dowers a reuni cu director di Departamento di Asuntonan di Casino, cu a confirma cu na ningun momento a duna ningun sorto di permiso pa cera casino pasobra esey no ta posibel y un permiso asina no ta existi. Locual a haci ta facilita pa hotel por mantene e permiso di casino pa por yuda nan yega na un otro operador mas pronto posibel.
