“15% di atracadonan ta Venezolano anto mayoria atraco cu ta tuma luga ta nos mesun hendenan local ta comete. Esey ta e cifranan cu nos tin.”
Minister di Husticia Arthur Dower no por indica si e cifranan aki ta pe aña ki of añanan anterior tambe. “Loke cu nos sa si ta cu e ultimo dianan aki tin diferente intento di atraco ta tumando luga y ora bo conclui hopi di nan ta hendenan Spaño.”
E ta agrega cu tur hende ta papiando di Venezolano siendo cu tin un cantidad di hende por ehempel di Colombia tambe, ademas cu mayoria ta wordo asisti pa hende local. ”Ami no por bisa un hende na final di dia pa absolutamente no trece un persona pais Aruba pasobra nos tin leynan cu ta duna bo cierto derechonan. Tin otro maneranan cu nan lo keda drenta Aruba y mi ta sigur cu nan lo inventa otro manera despues cu nos pone un stop na e manera cu nan ta haci e awo.”
Locual Ministerio di Husticia kier haci ta simplemente hende cuminsa compronde cu si bo contribui na crimen den pais, y seguramente awor yudando hende di exterior pa haya nan manera, bo tambe ta bay paga pe.
Polis
“Ami no tin cifranan pues ami no por papia di esey”, ta e contesta di vocero di polis, Lito Laclé ora cu Bon Dia Aruba a puntra si nan ta haya recientemente cu tin mas casonan di crimen cometi pa hende stranhero compara cu hende local.
Mas denuncia falso
Segun minister Dowers, algo cu ta hopi lamentabel y cual ta pasando ultimamente ta cu tin hende ta meld atraco mientras cu nan no a wordo atraca. “Esaki ta kita hopi tempo di e polisnan cu ta trahando hopi duro pa percura pa nos por soluciona en todo caso, casonan cu ta pasando di berdad cu gravedad halto. Nos ta spera esaki no tuma luga mucho hopi mas sino tin cu cuminsa tambe na persigui hendenan pa denuncia falso.”
