(AFP)—Ecuador a descubri un lek den tubonan di combustible den e region di Amazonia diasabra y a yama esaki un “atake,” algun dia despues cu un otro derame a afecta shen miles di hende.
E ministerio di energia no a reporta e tamaño di e derame ni a bisa si esaki a extende pa e Riu Coca, unda e planta hidroelectrico principal di e pais ta situa. Den un declaracion, e ministerio a bisa cu “un lek di azeta” a sucede den e provincia este di Napo. El a atribui e lek pa sabotahe.
Diamars siman pasa, e compania di azeta di e pais a declara un emergencia tocante e derame mas prome den e parti noroeste, cual a contamina varios riu y a laga shen miles sin awa limpi pa bebe. Autoridadnan tambe a denuncia cu e derame ta un acto di sabotahe.
E ministerio di energia a bisa cu lo tuma un decision si ta stop cu operacionnan di e planta Coca Codo Sinclair—cual ta provee 1.100 MW na e grid nacional—pa asina proteha su makinaria. E ministerio a bisa cu un ciere di e planta no lo resulta den recortenan di coriente, como cu suministro ta “garantisa” pa henter pais.
Ecuador a enfrenta varios blackout di te cu 14 ora den un dia den 2024 debi na e secura mas malo den 60 aña, cual a reduci e nivel di reservanan hidroelectrico significantemente.
A considera cu e derame di dia 13 di maart tabata causa pa un derumbe cu a kibra un tubo importante, cual a resulta den un derame di miles di bari di azeta. Desde e tempo ey e crudo a plama pa al menos cinco riu, incluyendo e Riu Esmeraldas cu ta conecta na e Ocean Pacifico, afectando suministro di awa limpi pa shen miles di hende.
Minister di Energia Ines Manzano a denuncia e supuesto sabotahe enfocando riba infrastructura di azeta. Presidente Daniel Noboa, den poder desde november 2023, ta enfrenta lider di oposicion Luisa Gonzales den un careda electoral dia 13 di april.
