Minister Croes: “Obesidad ta costa e pueblo hopi placa. Na luga di esey nos por conscientisa e pueblo pa nos por preveni e parti aki”

Diabierna 4 di maart ariba Dia Mundial di Obesidad Minister di Salud Publico y Turismo, Dangui Oduber, hunto cu DVG, IBISA y Ministerio di Deporte y Enseñansa, a anuncia e lansamento di e campaña nobo “Sa bo Number” pa conscientisa comunidad ariba e problema di obesidad.

Minister Endy Croes, como Minister di Enseñansa y Deporte, a indica su apoyo completo pa e campaña nobo aki y a anuncia algun otro proyecto cu su Ministerio tin ariba mesa pa contribui den e tema di conscientisacion pa un bida mas saludabel.

Manera ta conoci caba obesidad ta causa problemanan fisico, problemanan di salud y di salud mental. Minister Croes a sigura cu como Gobierno y como departamentonan encarga nan lo pone atencion pa conscientisa henter pueblo di Aruba durante henter e luna di maart, y kisas henter e aña, pa hiba un bida mas saludabel locual sigur consecuentemente lo ta miho pa pueblo den su totalidad.

“Obesidad ta causa problemanan diabetico, problemanan di curason y ta costa e pueblo hopi placa pa nos por atende cu nos propio pashentnan. Na luga di esey nos por conscientisa e pueblo pa nos por preveni e parti aki”, Minister Croes a bisa.

E campaña “Sa bo Number” kiermen cu cada persona ta midi nan cintura y mester sa si nan peso ta bon, si nan ta sobrepeso of nan tin problema cu obesidad. En conexion cu e campaña aki tambe DVG a lansa su website unda tin un BMI (Body Mass Index) calculator. Cu e calculator aki cada persona por calcula pa nan mes, a base di nan estatura y nan peso si nan peso ta bon, si nan ta sobrepeso of nan ta obeso.

Minister Croes a señala cu di parti di Ministerio di Deporte nan lo percura pa den combinacion cu e campaña nobo cu a wordo lansa nan tambe pone nan programanan cu ya caba ta den e vision di e aña aki den practica.

El a menciona cu un e programanan den nan vision ta por ehempel cu nan ta kere hopi pa den educa e muchanan ya caba for di scol, tanto riba e parti di comemento saludabel cu ta hopi importante den combinacion cu movecion. Pa e parti di movecion, segun el a indica, nan lo ta lansando den luna di maart e programa WE Escolar cu ta competencianan entre tur e scolnan na Aruba den diferente deporte.

“Esaki ta e parti di movecion di nos contribucion cu lo agrega na e programa aki y di tur e competencianan aki, seis scol lo clasifica den luna di mei, y den luna di juni lo tin un olimpiada escolar”, el a agrega.

Minister a menciona tambe cu den luna di april en adelante nan lo ta lansando diferente diadomingo den luna, minimo dos diadomingo pa luna, caminda nan lo bin cu un programa di caya recreativo. E concepto di esaki ta encera cu lo cera algun caya y pidi e pueblo, sin un limite di edad, pa probecha y haci movecion durante oranan di mainta ariba diadomingo y asina crea nan contribucion ariba e aspecto aki.

Minister a recorda cu tempo e tabata parlamentario algun aña atras nan a studia un parti di e gastonan di AZV riba e tematica di obesidad y diabetes y el a informa cu nan a mira riba e problema diabetico cu 17% di e pueblo di Aruba ta sufri di un of otro problema di diabetes. Esaki, Minister a remarca, ta costa e pueblo 77 pa 80 miyon florin pa aña.

El a enfatisa cu si bin cu tipo di programanan aki y conscientisa e pueblo, cuminsando na scol cu e muchanan, lo contribui tambe na e parti preventivo unda e gastonan halto cu ta wordo usa pa e parti curativo por baha, specialmente den e tempo dificil actualmente.

Minister a subraya cu tipo di trabounan asina no mester bin di un Ministerio of di un persona solamente, “mi ta kere e mester bin den un union di henter e comunidad, tur minister, tur parlamentario, henter e pueblo y hunto nos por logra e paso grandi aki pa un Aruba mas saludabel”, el a agrega.

Minister Croes a ricibi e pregunta for di un miembro di prensa si tin plan pa crea un campaña nacional na tur e scolnan na Aruba pa yuda cu e tema di un bida mas saludabel. El a contesta cu tin hopi reto pa cu enseñansa den su totalidad. El a indica cu nan a institui e plataforma uno, cu ta consisti di tur e presidentenan di e 10 diferente directivanan di e scolnan hunto, Directie Onderwijs y Inspectie Onderwijs y el a splica cu riba e plataforma aki nan ta atendiendo cu diferente tema y e tema di salud ta un di e puntonan riba agenda tambe cu nan lo bay atende ariba e plataforma.

El a aclara cu hopi di directiva di e scolnan ta stichting y gobierno tin un obligacion segun ley pa duna nan placa, pero nan no por dicta den nan curriculum. “Scolnan cu ta cay bao di gobierno, DPS, eynan ta caminda nos lo por enfoca un direccion, pero ariba plataforma uno nos lo bay expresa nos preocupacionnan y pidi tambe e cooperacion di tur e scolnan pa asina hunto nos por enfrenta e problema aki”, el expresa.