Manera conoci, minister encarga cu Asuntonan Social a revoca maneho di gobierno anterior relaciona cu cobramento di Bijstand. Nos a puntra prome minister Evelyn Wever-Croes (MEP) si den su ministerio di Asuntonan General tambe lo revoca algun maneho laga atras di e minister anterior y ki cambio lo trece den e cartera aki. El a contesta esaki ayera mainta durante ultimo rueda di prensa di gobierno pa e aña aki, reflexionando riba e aña nos tras y meta pa siguiente aña.
E premier a contesta Bon Dia cu e ultimo cinco siman cu nan ta na Bestuurskantoor a bay mas riba e parti organisatorio. Pues pa pone por ehempel oficinanan traha debidamente, servernan di computer cu ainda no por a keda cla cu ne, pone e telefon central traha y ora cu e mensahe no ta yega ta premier mes mester cay aden. Contrario na diferente minister cu si a logra di haci hopi puntonan ‘inhoudelijk’ , den e ministerio di Asuntonan General mes no tin decisionnan asina cu mester a wordo tuma ainda segun e mandatario a laga sa. “Nos ta sigui evalua diferente projectonan cu tabata tin andando. Nos ta evaluando diferente departamento cu a wordo crea nobo bao di e minister di Asuntonan General anterior. Cu nos ta prefera di bay mas na pone tur e forsanan hunto enbes di e maneho cu tabata tin anteriormente di separa hopi cos,” minister Wever-Croes ta bisa. Pero na momentonan aki e ta enfatisa cu e no ta algo cu e por anticipa riba dje. E ta bisa cu nan ta den e fase awo pa busca conseho pa despues por tuma decision.
‘2017 tabata aña di cambio’
Ayera premier a reflexiona un tiki riba e aña cu ta cabando bisando cu aña 2017 ta uno cu nos na Aruba a mira hopi cambio. El a toca riba e campaña electoral cu nos tabata tin cual e ta bisa tabata uno diferente, di cual e enfasis tabata mas riba programa di partido y un campaña electoral cu a desemboca den un resultado di eleccion den cual pueblo a pidi un coalicion. “Un temporada di formacion hopi interesante y hopi largo pero pa prome biaha den 20 aña cu na Aruba nos ta haya nos ta negosha prome cu nos por a forma un gobierno,” e mandatario ta bisa. E formacion tin como caracteristica principal cu tres partido – practicamente totalmente diferente cu otro pensamentonan – a sa di yega na otro pa yega na un programa di gobernacion. “Y ohala cu e mesun union y cooperacion cu por a refleha durante temporada di formacion por refleha den henter nos comunidad. Pasobra e pueblo akinan den union a logra cosnan grandi. Anto e retonan cu ta enfrenta e pais aki ta hopi grandi, y ta den union so nos por bay enfrenta tur esakinan.”
Tema financiero
E premier ta bisa cu ora nan a asumi responsabilidad di gobernacion mas cu un luna pasa caba, nan a wordo confronta cu algo pa nan ta un crisis financiero. Unabes e cifranan real y magnitud di e problema financiero di Aruba aki tabata conoci, e ta bisa cu nan tabata sa cu na e momento akinan e enfasis mester bay riba e tema financiero. “Nos punto di bista ta cu nos kier cumpli cu ley y un presupuesto balancia. Sinembargo e momento ey e no tabata simplemente posibel. Pues nos a bay den dialogo cu nos partnernan akinan na Aruba, den preparacion pa bay den dialogo cu Hulanda, pa asina haya e tempo y espacio necesario pa yega bek riba e caminda di un presupuesto balansa. Pero a base di cifranan realistico.” Y den esaki e mandatario ta sigui bisa cu nan ta hopi agradecido di a haya sosten aki na Aruba pero tambe den Reino na Hulanda, unda a haya e espacio necesario pa presenta e trayectoria nobo pa yega na un presupuesto balansa.
Crisis Social
E mandatario a sigui toca riba locual nan como gobierno nobo a wordo confronta cu ne apenas algun dia despues di gobernacion: locual nan ta yama e crisis social. Premier: “Algo cu nos tur tabata sa cu ta pasa na Aruba. Pero cu ora nos a wordo confronta cu e morto cruel di e dos angelitonan, ya caba na e momento ey nos tabata sa – manera nan ta bisa na Papiamento crioyo – e ‘awa a pasa hariña.’ Ora a pasa e caso tragico aki, e mandatario ta bisa cu e ta kere tur hende mester a bin di acuerdo cu e tema social mester haya atencion.
Ya esaki no por wordo hala un banda mas y haci manera cu e no ta pasa. E mandatario a expresa cu: “Pone e ser humano central tabata nos compromiso, e ta y lo sigui ta nos compromiso. Diligentemente nos ta atendiendo cu e tema aki, poniendo tur esfuerso hunto pa realmente por pone e ser humano central cuminsando cerca nos muchanan. Brindandonan proteccion, cariño y oportunidadnan den bida. Y esey ta locual ta bay tipifica e aña nobo nos dilanti; e ser humano central.” El a sigui bisa: “Haciendo Aruba sigur un biaha mas. Un luga dushi pa biba unda nos por lanta nos yiunan den trankilidad. Un luga cu ta brinda oportunidad di estudio y empleo pa nos yiunan. E oportunidadnan ey tambe pa nos mamanan soltero y cuido digno pa nos grandinan. Esey ta e compromiso di nos gobierno cual nos lo cumpli cu ne den e aña nos dilanti.”
