Diabierna mainta hues a duna veredicto den e caso cu pais Aruba a entama contra e ciudadano Williams.

“Den e veredicto cu hues a indica cu un ciudadano manera sr. Williams cu ta considera su mes como un ‘press group’ mester por uit su mes, y cu esey no kiermen cu e tin prueba di locual cu e ta trece dilanti, pero cu e tin derecho di vocifera su opinion”, minister Otmar Oduber ta enfatisa den un comunicado cu Bon Dia a ricibi.

E proyecto cu ta encera saneacion di Parkietenbos y procesamento di desperdicio ta uno sumamente importante pa pais Aruba. Sr. Williams na varios ocasion a papia di cu lo tin deal nan cera y cu tin hendenan poni pa gana e destaho pa e proyecto aki, mientras cu ta acusa minister Oduber di ta corupto.

Considerando e consecuencianan cu e acusacionnan infunda aki por trece pa e proceso serio aki a tuma e decision pa hiba e ciudadano corte na bienestar di pais Aruba.

“Sr. Williams no por a presenta ningun prueba di su ponencianan den corte”, e minister ta bisa.

“Hues a bisa cu sr. Willimas no tabatin ningun prueba di locual cu el a trece dilanti y cu ta trata unicamente di su opinion personal. Esaki ta sumamente importante pa remarca pasobra no tin ningun caso di corupcion y hues den e veredicto ta bisa cu e uzo di e palabra di corupcion di parti sr. Williams ta su conclusion personal. Hues ta enfatisa cu e mag di expresa su opinion personal.”

Den declaracion haci na prensa, minister Oduber ta enfatisa cu ‘e tambe ta sali for di e punto di bista cu cada persona tin e derecho pa expresa nan opinion personal’, pero e ora tin cu bisa cu e ta bo opinion personal. Y no trece esaki dilanti manera cu tin prueba di esaki cual sr. Williams a haci na diferente ocasion.

Locual cu hues a presenta den e caso contra sr. Williams ta ‘importante pa e proceso’ cu ta andando pa loke ta saneacion di Parkietenbos y miho maneho di desperdicio. Y cu e 22 companianan cu ta participa na e momentonan aki sa, cu ‘no tin ningun prueba’ di corupcion, no tin nada robes tumando luga y cu tur cos ta canando manera cu cualkier destaho publico transparente mester cana.

“Finalmente hues a tuma nota y a constata tambe cu e informacion cu sr. Williams a presenta tabata puro speculacion bruha, sin base y dificil pa volg. Importante ta cu e ponencianan di sr. Williams ta bari for di mesa y ta encera puro speculacion y opinion personal”, minister Oduber ta finalisa bisando.