Recientemente Conseho di Minister a aproba e proposicion cu minister Michelle Hooyboer-Winklaar di Enseñansa a trece, cu zwanterschapsverlof no ta considera como vakantie pa maestronan di scol.
Esaki ta informacion for di un relato di Ministerio di Enseñansa.
Maestronan di scol cu ta haya baby durante e vakantieperiodo of cu tin un overlap den siman cu zwangerschapsverlof, por ricibi un maximo di 15 dia di vakantie cu por wordo tuma di biaha despues di e periodo di zwangerschapsverlof of despues. Esaki ta considera ‘inhaalvakantie’. E dianan di compensacion manera indica por wordo tuma di biaha of na final di e vakantie di scol cu ta overlap cu e dianan di verlof, asina e comunicado ta splica.
E decision ta drenta na vigor di biaha y ta conta asina desde school vakantie 2017. E memo cu fecha 13 di juni a wordo manda na tur directiva di scol pa informa di e decision aproba.
Importante
Zwangerschapsverslof na Aruba ta trata derecho pa tur trahado femenino pa 12 siman na cas: normalmente 4 siman prome cu parto y 8 siman despues di parto.
“E periodo aki ta masha importante pa tanto mama y baby, ley ta stipula cu e 12 siman nan aki ta conta pa tur trahado, sea di sector publico of priva. Esaki tambe ta conta pa tur juffrouw di scol, di tur directiva di scol”, asina ministerio di Enseñansa ta informa.
Na aña 2006 gobierno di Aruba bou di signatura di MEP, a tuma un decision por medio pa cancela dianan di zwangerschapsverlof pa maestronan di scol si nan verlof ta cay den mesun periodo di vakantie grandi di scol. Cu otro palabra, vakantie di scol a wordo considera mesun cos cu zwangerschapsverlof.
Minister Hooyboer-Winklaar ta bisa cu e ta considera esaki un decision discriminatorio mirando cu pa un hende muhe e temporada despues di un parto ta un derecho stipula pa ley y no un vakantie. “Mi a cuminsa cana e caminda pa puntra conseho for di instancianan den gobierno pa sondea ki posibilidad tin pa cambia e decision aki, y pa implementa algo cu ta rasonabel y ta cuadra cu maneho na otro paisnan y derechonan internacional, incluso Hulanda.”
